Las votantas ed ils votants da las duas vischnancas da Bravuogn e da Filisur han votà ils 31 da mars 2017 cleramain a favur da la fusiun a la nova vischnanca Bravuogn Filisur. Tras quai cuntinuescha il process da la refurma da las structuras en la Val d'Alvra. Ils auts meds finanzials chantunals da promoziun permettan a la nova vischnanca da cumenzar cun relaziuns finanzialas supportablas. Grondas pretensiuns procuran per in svilup persistent da las finanzas.

La Val d'Alvra s'occupa dapi passa in decenni da refurmas structuralas. Dapi il 1. da schaner 2015 exista la nova vischnanca d'Alvra. Durant la fasa da las discussiuns da fusiun en la val èn sa stentads tant Bravuogn sco er Filisur da betg perder il connex structural. Ina fusiun da tut las vischnancas è sa mussada per differents motivs sco betg realistica.

Nova vischnanca da Bravuogn Filisur
Il project da fusiun Bravuogn Filusur ha cumenzà il zercladur 2015. Schebain che las duas vischnancas collavuran dapi in temp pli lung en differents secturs e sa vesan confruntadas cun grondas sfidas finanzialas, èsi stà necessari da contractar intensivamain. Il termin da votaziun ch'era previs oriundamain il zercladur 2016 ha stuì vegnir spustà per plirs mais. Ils 31 da mars 2017 han la finala decidì tuttas duas radunanzas communalas d'acceptar il contract da fusiun. Tras la fusiun resulta ina vischnanca cun circa 950 abitantas ed abitants. Ina surfatscha da circa 190 kilometers quadrat attribuescha la nova vischnanca a las 10 vischnancas cun la pli gronda surfatscha en il chantun. La vischnanca da Bravuogn Filisur daventa cumparegliabla cun las vischnancas da Val Müstair u da Puschlav.

Nova via en l'avegnir finanzial
Ils problems finanzials da las duas vischnancas èn evidents. Il chapital ester da 28 milliuns francs, ch'è s'accumulà per la fin da l'onn 2014, è considerabel e preoccupant. Ils debits nets (facultad finanziala minus chapital ester) per persuna importan 11 311 francs a Bravuogn (incl. ovra electrica) e 14 762 francs a Filisur. La nova gulivaziun da finanzas n'enconuscha ultra da quai betg pli meds finanzials specifics da la gulivaziun dal basegn spezial, uschia che las duas vischnancas ston cumpensar ensemen en media circa 1,4 milliuns francs per onn. En questa situaziun pretensiusa è la regenza sa decidida da conceder ina remissiun dals debits a la nova vischnanca e da garantir tut en tut 8,615 milliuns francs en il rom da la promoziun da fusiuns. L'indebitament net per persuna s'avischina uschia a la limita critica da 5000 francs. Quai è bain anc supportabel, ma anc adina aut. La responsabladad per l'avegnir finanzial n'è insumma betg giu da maisa per la vischnanca.

Las stentas per ina recreaziun da las finanzas communalas ston avair lieu vinavant u ston schizunt vegnir intensivadas. La medema finamira persequiteschan disposiziuns, tenor las qualas l'entira contribuziun da promoziun sto vegnir duvrada en moda liada ad intents specifics e tenor las qualas ulteriuras cundiziuns chantunalas ston vegnir ademplidas. En spezial sto la nova vischnanca procurar ch'il chapital ester vegnia reducì entaifer 10 onns per ulteriurs 5 milliuns francs. Plinavant resta la nova vischnanca sco er sia ovra electrica ad interim attribuida al stgalim d'intervenziun 2 tenor il dretg da surveglianza.

Il cussegl grond vegn a tractar la missiva en la sessiun d'october 2017.

Agiunta:
Missiva


Infurmaziuns:
Presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun