Ils dis europeics dal monument han lieu en Svizra sonda e dumengia ils 9 e 10 da settember. En il Grischun han lieu las occurrenzas sonda, ils 9 da settember, en differents lieus dal Surses.

Ils dis dal monument vegnan averts uffizialmain sonda, ils 9 da settember, a las 11.30 a Riom tar il café Carisch. Ils pleds d'avertura vegnan salvads da cusseglier guvernativ Martin Jäger, schef dal departament d'educaziun, cultura e protecziun da l'ambient, da Leo Thomann, president communal da la vischnanca da Surses, da Simon Berger, tgirader chantunal da monuments, da Thomas Reitmaier, archeolog chantunal, sco er da Ludmila Seifert, mainagestiun da la protecziun da la patria dal Grischun.

Gia la sonda avantmezdi a partir da las 9.00 vegnan purschidas visitas guidadas a Casti, Parsonz, Riom, Salouf, Savognin e Tinizong. Questas visitas guidadas han lieu ina segunda giada il suentermezdi, suenter l'occurrenza d'avertura e suenter l'alimentaziun culinarica en il café Carisch. Uschia pon persunas interessadas frequentar quest di duas visitas guidadas interessantas sut ina direcziun cumpetenta en ils vitgs respectivs. En accordanza cun il tema "pumpa e pussanza" èn ils organisaturs sa decidids quest onn per ina realisaziun en la regiun dal Surses. Betg mo las numerusas ruinas da chastels, mabain er las baselgias marcantas en questa regiun èn segns exteriurs per las relaziuns da pussanza e per il svilup da pumpa che caracteriseschan la cuntrada en moda decisiva. Perquai ch'il dumber da participantas e participants è limità per las singulas visitas guidadas, èsi necessari da s'annunziar tar la tgira da monuments.

Per in vast public
Ils dis europeics dal monument èn ina manifestaziun culturala dal cussegl da l'Europa e vegnan lantschads uffizialmain da quel. L'iniziativa vegn er sustegnida da l'Uniun europeica. Ils dis dal monument han lieu en 50 pajais europeics. Dapi lur emprima realisaziun l'onn 1994 èn ils dis europeics dal monument sa sviluppads a l'occurrenza la pli gronda en il sectur da la tgira da monuments. La finamira da questa occurrenza è quella da sensibilisar in vast public per il mantegniment da bains culturals.

En Svizra vegnan las visitas organisadas dals posts spezialisads federals, chantunals e municipals per la tgira da monuments e per l'archeologia. Els tschernan mintga onn ils objects, contacteschan las proprietarias ed ils proprietaris ed organiseschan las visitas guidadas e las occurrenzas al lieu. Il center naziunal d'infurmaziun davart il patrimoni cultural (NIKE) è responsabel per la coordinaziun da las circa 360 occurrenzas en l'entira Svizra sco er per la lavur naziunala da medias e da publicitad.

Agiunta:
program


Infurmaziuns:
Simon Berger, tgirader chantunal da monuments/uffizi da cultura, tel. 081 257 27 91, e-mail Simon.Berger@dpg.gr.ch  



Gremi: uffizi da cultura
Funtauna: rg uffizi da cultura