Ina bova devastanta al Piz Cengalo ha chaschunà ier gronds donns en Bregaglia. La presidenta da la regenza è sa procurada oz ina survista da la dimensiun da la destrucziun.
La presidenta da la regenza Barbara Janom Steiner è sa laschada infurmar al lieu ed è sa scuntrada cun la presidenta communala Anna Giacometti. Ella ha visità la populaziun evacuada ed ha garantì a tala sco er a la vischnanca la solidaritad cumplaina ed il sustegn maximal da vart dal chantun. Impressiunada spezialmain è ella stada da las prestaziuns da las forzas d'acziun e d'agid al lieu, che furneschan nuninterruttamain lavur excellenta. La regenza engrazia a tut las forzas d'acziun dal chantun, da la vischnanca e da terzas organisaziuns sco er a tut las autras persunas participadas per lur engaschament exemplaric. La presidenta da la regenza ha er exprimì la speranza che las persunas sparidas possian vegnir chattadas uschè svelt sco pussaivel.
Fotografia:
La presidenta da la regenza Barbara Janom Steiner en discurs cun la presidenta communala Anna Giacometti e cun il schef da la polizia da regiuns ost Marco Steck.
Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail
Barbara.Janom@dfg.gr.ch
Gremi: regenza
Funtauna: rg chanzlia chantunala dal Grischun