Cun sias purschidas decentralas d'auta qualitad per il provediment da la sanadad en cumbinaziun cun ses avantatgs da la cuntrada e dal clima posseda il Grischun las meglras premissas per il turissem da sanadad. La conscienza da sanadad creschenta da la populaziun avra ad ospitals ed ad ulteriurs interessents en il chantun la pussaivladad da s'etablir sco centers da cumpetenza per dumondas da la sanadad e da sviluppar per in public extrachantunal cumbinaziuns da purschidas novas ed independentas da la stagiun.

Contribuziun per segirar il provediment decentral
A chaschun da l'orientaziun a las medias davart l'impurtanza dal turissem da sanadad per il chantun Grischun ha il schef dal departament da giustia, segirezza e sanadad (DGSS), cusseglier guvernativ Christian Rathgeb, explitgà che la finamira da la politica da sanadad dal chantun saja quella da mantegnair a lunga vista las structuras dal provediment da la sanadad decentral en il chantun. Ina contribuziun en questa direcziun possia prestar la dumonda en il turissem da sanadad da pazientas e pazients extrachantunals, da giasts da cura, da reabilitaziun e da vacanzas sco er da persunas che possedian abitaziuns secundaras. Spezialmain en la stagiun turisticamain bassa – ed uschia er bassa per l'occupaziun dals letgs en ils ospitals – duaja la dumonda dal turissem da sanadad vegnir augmentada cun purschidas correspundentas per generar uschia ina valurisaziun supplementara per las instituziuns dal provediment da la sanadad ed en las regiuns da sanadad. Uschia possian er vegnir mantegnidas e stgaffidas da nov plazzas qualifitgadas da lavur e da furmaziun en il sectur da sanadad. Il chantun Grischun persequiteschia cun quai ina strategia che sa differenzieschia d'auters projects cun finamiras sumegliantas en Svizra. Il turissem da sanadad è tenor cusseglier guvernativ Rathgeb interessant er ord vista dal turissem en general, perquai che pazientas e pazients che vegnan tractads ambulantamain sco er lur confamigliars dovran las purschidas da l'hotellaria e da la parahotellaria. Grazia a novas purschidas en il sectur da la prevenziun possia vegnir generada ina valurisaziun supplementara er per ils manaschis turistics.

Gruppa directiva per sustegnair il turissem da sanadad
Per sustegnair il DGSS tar la realisaziun dal punct central da svilup "Turissem da sanadad" ha la regenza – tenor cusseglier guvernativ Christian Rathgeb – nominà ina gruppa directiva che ha cumenzà cun sia lavur il favrer da quest onn. Tenor il parsura da la gruppa directiva, Philipp Gunzinger, ha quella tractà en sia segunda sesida dals 28 d'avust 2017 oravant tut dumondas strategicas pertutgant il turissem da sanadad en il chantun. En quest connex ha ella decidì da sa basar en il process per sviluppar ina strategia concernent il turissem da sanadad en il Grischun oravant tut sin las purschidas existentas ch'èn qualifitgadas sco relevantas per il turissem da sanadad. Philipp Gunzinger ha punctuà en quest connex che la lavur da la gruppa directiva sa drizzia tenor finamiras cun in'orientaziun a lunga vista e ch'i na sajan la finala betg mo la strategia, mabain er l'atgna iniziativa dals partenaris interessads, en spezial da las instituziuns da sanadad, decisivas per il posiziunament cun success en ils martgads.

Sustegn dal Forum economic dal Grischun
Alois Vinzens ha menziunà en il rom da sias explicaziuns ch'il Forum economic dal Grischun vesia il turissem da sanadad sco ina da diversas schanzas per il svilup futur da las vals dal chantun. Correspundentamain saja il Forum economic sa declerà pront da sustegnair substanzialmain las activitads dal chantun per promover il turissem da sanadad. Per quest intent duajan vegnir analisadas las opziuns per il turissem da sanadad en il rom d'in project realisà da la direcziun dal Forum economic e formuladas recumandaziuns per mauns da la gruppa directiva che sa basian sin quella analisa.


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Philipp Gunzinger, parsura da la gruppa directiva per il turissem da sanadad, tel. 081 861 10 00, e-mail Philipp.Gunzinger@cseb.ch
- Alois Vinzens, president dal Forum economic dal Grischun, tel. 081 253 34 34, e-mail Info@wirtschaftsforum-gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad