Suenter avair examinà detagliadamain differentas variantas ha la regenza decidì da stritgar il project d'exposiziun "Colliaziun traversala punt da son Luzi" da l'onn 2008 e d'incumbensar l'uffizi da construcziun bassa d'elavurar in nov project d'exposiziun.
Il november 2010 ha la regenza approvà il project d'exposiziun da l'onn 2008 per curreger la via dal Scanvetg, part Cuira‑Arosa, traject colliaziun traversala cun la via dal Scanvetg. Il project ha prevesì da traversar la Plessur e la part sid dal quartier Sand cun ina punt artgada d'ina lunghezza da 465 meters e d'ina autezza da maximalmain 135 meters.
Nov giudicament tras la regenza
Cunter l'approvaziun dal project han plirs abitants dal quartier Sand a Cuira fatg recurs tar la dretgira administrativa. Quella ha refusà il recurs. Ils recurrents han tratg vinavant la decisiun davant il tribunal federal che ha approvà per part il recurs e suspendì la decisiun da la dretgira administrativa. Il project è vegnì refusà a la regenza dal chantun Grischun per al giuditgar da nov e per decider da nov suenter avair cumplettà la cumparegliaziun da las variantas.
La varianta alternativa è meglra
Pervia da la sentenzia dal tribunal federal ha la regenza laschà far in studi detaglià cun ina cumparegliaziun cumplessiva da variantas. Sin basa da las enconuschientschas fatgas en quest connex è vegnì elavurà supplementarmain in project preliminar reducì da la varianta alternativa cun las meglras perspectivas. Questa varianta prevesa da traversar la val cun ina punt diagonala envers l'axa da la val che maina sur territori betg abità en il sectur Brandacker.
La cumparegliaziun dal project d'exposiziun contestà cun la varianta alternativa mussa che la varianta alternativa è in zic meglra ch'il project vertent. Il project d'exposiziun contestà pussibilitescha bain ina soluziun tecnica ideala cun traversar la val al lieu il pli stretg. La varianta alternativa persvada però cun quai ch'ella resguardà pli fitg la situaziun dals abitants dal quartier Sand, e quai malgrà custs pli auts.
Nov project d'exposiziun per la colliaziun traversala
Perquai ha la regenza decidì d'abolir il project d'exposiziun da l'avrigl 2008 e d'incumbensar l'uffizi da construcziun bassa d'elavurar in nov project d'exposiziun per la traversada da la val en il sectur Brandacker. Perquai ch'il project da construcziun "Via dal Scanvetg, colliaziun traversala punt da son Luzi" è vegnì integrà en il program da construcziun da vias 2017‑2020, pon ils pass necessaris en chaussa vegnir iniziads anc quest onn.
Fotografia:
Visualisaziun dal project d'exposiziun da la punt da son Luzi ch'è vegnì abolì en il fratemp
Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail
Mario.Cavigelli@bvfd.gr.ch
Gremi: regenza
Funtauna: rg chanzlia chantunala dal Grischun