Er quest onn envida la campagna "Co vai cun tai?" la populaziun grischuna da discutar en il mintgadi dapli davart la sanadad psichica e davart malsognas psichicas. L'accent da la campagna da quest onn è mess sin la sanadad psichica en la famiglia.

Ensemen cun ils servetschs psichiatrics dal Grischun, cun l'ospital chantunal dal Grischun e cun la psichiatria d'uffants e da giuvenils dal Grischun mussa l'uffizi da sanadad a partir dals 18 da settember 2017 la campagna sin placats gronds ed als moniturs da reclama en ils bus. Cumplementarmain po la nova broschura "Psychische Gesundheit und Erkrankungen in der Familie – Anregungen für Eltern und Bezugspersonen" vegnir empustada gratuitamain sin www.graubünden‑bewegt.ch.

Malsognas psichicas èn fitg derasadas
I dat temas che restan ditg en il zuppà. Nagin na vul las percepir – fin ch'ellas vegnan andetgamain tuttina a la glisch e na sa laschan betg pli snegar. Malsognas psichicas tutgan savens latiers. Mintga segund uman daventa ina giada en sia vita psichicamain malsaun. Quai pertutga famiglias en differentas modas. D'ina vart vegnan messas durant l'uffanza basas impurtantas per in saun svilup psichic. Da l'autra vart è pertutgada l'entira famiglia, sch'ina commembra u in commember daventa psichicamain malsaun.

Discurrer gida
Tscherts geniturs vulessan schanegiar lur uffant ed eviteschan da discurrer cun el davart problems psichics. Per l'uffant n'è quai nagin servetsch. Uffants sentan, sch'insatge perda l'equiliber – saja quai tar sasez, tar la mamma, tar il bab u tar in fragliun. Els dovran persunas creschidas che discurran cun els davart la malsogna e che als sustegnan da chattar ina pussaivladad dad ir enturn cun tala. Relaziuns da confidenza e da sustegn entaifer ed ordaifer la famiglia èn in factur da protecziun impurtant per uffants e per persunas creschidas. Famiglias ch'èn entretschadas bain e ch'èn disadas da discurrer cun terzas persunas davart difficultads e davart sfidas, pon plitgunsch vegnir tschiffadas e sustegnidas da lur ambient er en cas d'ina crisa.

Scolaras e scolars s'occupan activamain dal tema
L'uffizi da sanadad lascha vegnir ils 26 da settember 2017 la producziun da teater da Basilea "Je suis Cinderella" a Landquart per classas da scola grischunas. Var 750 scolaras e scolars han là la pussaivladad da s'occupar intensivamain dal tema "sanadad psichica en la famiglia". Cun la paraula "Tschenderletga", che vegn inscenada da maniera moderna e confurm al temp, pon persunas d'instrucziun sa deditgar cun lur classas en moda attractiva als temas resilienza, mobing, famiglia da patchwork e stima.

Agiuntas:
Broschura "Psychische Gesundheit und Erkrankungen in der Familie"
Flyer dal teater "Je suis Cinderella"

Ulteriuras infurmaziuns:
Campagna "Sanadad psichica en la famiglia"
Campagna "Co vai cun tai?"


Infurmaziuns:
Denise Rudin, manadra da partiziun da l'uffizi da sanadad, tel. 081 257 64 08, e-mail Denise.Rudin@san.gr.ch


Gremi: uffizi da sanadad dal Grischun
Funtauna: rg uffizi da sanadad dal Grischun