La cussegliera guvernativa Jacqueline Fehr e ses collavuraturs da l'uffizi turitgais per l'execuziun giudiziala han visità dacurt il plazzal dal futur stabiliment giudizial serrà a Cazas.

La visita da lavur ha servì al barat en il sectur da l'execuziun giudiziala. Cun questa chaschun ha la cussegliera guvernativa Jacqueline Fehr confermà la decleraziun d'intenziun dal chantun Turitg da l'onn 2011. Cun planisar ses basegn resguarda il chantun Turitg er il stabiliment giudizial a Cazas ch'è actualmain en construcziun, ed ina giada ch'il stabiliment è avert, vegn il chantun Turitg a far diever d'ina part considerabla da las plazzas da tal. Da l'avanzament da las lavurs da construcziun han la cussegliera guvernativa Jacqueline Fehr e sia delegaziun pudì far in agen maletg al lieu. Tuttas duas varts han accentuà la fitg buna collavuraziun, e la cussegliera guvernativa turitgaisa è stada impressiunada da la construcziun brutta. La delegaziun turitgaisa è vegnida beneventada dal cusseglier guvernativ e directur da giustia Christian Rathgeb. Da la delegaziun grischuna han plinavant fatg part Regula Hunger, secretaria dal departament da giustia, segirezza e sanadad, Mathias Fässler, manader da l'uffizi per l'execuziun giudiziala, Padruot Salzgeber, directur dal stabiliment giudizial Realta, Ines Follador, directura dal stabiliment giudizial Sennhof sco er Jürg Räber, manader da project en il stabiliment giudizial Realta. Durant l'inspecziun al lieu èn las delegaziuns vegnidas accumpagnadas dad Andrea Pfister da l'uffizi da construcziun auta.
Il nov stabiliment serrà a Cazas vegn ad avair 152 plazzas. Per la gestiun vegnan stgaffidas circa 80 plazzas da lavur supplementaras. Il nov stabiliment giudizial è in stabiliment dal concordat. Quai vul dir ch'il stabiliment stat a disposiziun a tut ils chantuns da la Svizra orientala per l'execuziun giudiziala serrada.

Fotografia agiuntada:

Las delegaziuns da Turitg e dal Grischun sin il plazzal dal futur stabiliment giudizial a Cazas.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad