Las bovas devastantas en Bregaglia cumprovan en moda impressiunanta: La Svizra tegna ensemen. La regenza engrazia als chantuns, a las vischnancas, a las diversas interpresas ed instituziuns sco er a las persunas privatas che han gia fatg ensemen donaziuns da plirs milliuns francs.

I vegn anc a durar in mument, fin che la summa dal donn material po vegnir quantifitgada exactamain. Ma gia oz è la regenza grischuna optimistica che la vischnanca da Bregaglia e sia populaziun na ston betg far quint cun blers custs restants. Engraziar dastgan els quai d'ina vart a la Chadaina da fortuna che ha avert gia in'emna suenter la bova in conto collectiv per Bondo. Dapi lura èn vegnids pajads sulet sin quest conto spezial passa 5 milliuns francs.

Da l'autra vart vul la regenza engraziar er al Padrinadi svizzer per vischnancas da muntogna, a las regenzas chantunalas, a las bleras vischnancas, instituziuns e persunas privatas en tut la Svizra ed en ils pajais vischins che han fatg ina donaziun a favur da la populaziun da la Bregaglia.

Er sch'i resta da sperar ch'in tschert mintgadi returnia puspè uschè svelt sco pussaivel en Bregaglia, resta la bova devastanta en memoria sco eveniment tragic. Cun ses quitads è la regenza tar las victimas e lur survivents.

La finala vul la regenza accentuar il grond engaschi exemplaric da tut las forzas d'agid ed exprimer ad ellas ses engraziament persuenter.

Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: regenza
Funtauna: rg regenza