La regenza ha approvà il plan d'areal per "Cuira vest" sco basa per l'ulteriur svilup dal territori da la citad. Ultra da quai ha ella stgaffì las premissas per in project da la vischnanca da Luzein per la protecziun cunter aua gronda.
Approvà il plan d'areal "Cuira vest"
La regenza ha approvà il plan d'areal "Cuira vest" cun la resalva da suspender la procedura d'approvaziun concernent il "areal da traffic bus" e duas regulaziuns dal plan d'areal che stattan en connex cun quella. Il "areal da traffic bus" è vegnì determinà en il plan d'areal per lung da la Kasernenstrasse da la citad ora tranter las rundellas Ringstrasse e Comercialstrasse. Duas regulaziuns dal plan d'areal fixeschan en quest connex ch'i stoppia vegnir resguardà en il rom da las proceduras dal plan da quartier respectivas spazi per lung da la Kasernenstrasse per eventualmain pudair engrondir il vial da bus e ch'i stoppian en quest reguard vegnir contactadas a temp las interpresas cumpetentas e las instanzas da la citad. Cunter questa determinaziun dal plan e cunter las regulaziuns correspundentas dal plan d'areal èsi vegnì fatg recurs tar la regenza.
Per tractar quest recurs dovri anc intgin temp. Per che quai na retardeschia betg l'approvaziun da tut il plan d'areal, pari dad esser inditgà d'approvar il plan d'areal malgrà il recurs gia ussa cun la resalva correspundenta. Ord vista da la regenza na fissi betg giustifitgabel da retardar l'entrada en vigur da tut il plan d'areal che cumpiglia var 2,2 hectaras sulettamain pervia d'in "areal da traffic bus" dispitaivel.
Suenter la construcziun dals emprims dus sgrattatschiels schumellins "City West" e pervia da la gronda dumonda per construir ulteriuras chasas autas èsi sa mussà che las cundiziuns generalas areguard la planisaziun dal territori ed areguard la construcziun urbanistica ston vegnir concretisadas. Per quest intent è vegnì elavurà il plan d'areal che serva en l'avegnir sco instrument da coordinaziun per l'ulteriura planisaziun. Pervia da la grondezza da l'areal, pervia dal grond orizont da planisaziun da 25 onns sco er pervia da l'intschertezza, cura che tge quartier vegn sviluppà, è s'offrida in'etappaziun spaziala e temporala. Il plan d'areal garantescha ch'ils plans da quartier vegnan coordinads in cun l'auter.
© Comet Photoshopping ScRL / Dieter Enz
Approvà il project per la protecziun cunter aua gronda da la vischnanca da Luzein
La revisiun parziala da la planisaziun locala, concludida ils 23 da zercladur 2017 da la vischnanca da Luzein, vegn approvada da la regenza cun intginas correcturas.
La finamira da la revisiun è in project per la protecziun cunter aua gronda che duai proteger il territori "Under Dalvazza" cun la zona da mastergn e la serenera. Il project cumpiglia ultra da las mesiras necessarias per la protecziun cunter aua gronda er mesiras per augmentar la valur da la zona umida "Dalvazza" per lung da la Landquart. Ultra da quai ha la vischnanca da Luzein prendì l'occasiun d'adattar la zona da mastergn existenta en trais lieus a l'ur al project da vias naziunalas "sviament da Küblis".
© Comet Photoshopping ScRL / Dieter Enz
Glisch verda per l'engrondiment da l'hotel Central a Val Müstair
La regenza ha approvà la revisiun parziala da la planisaziun locala che la vischnanca da Val Müstair ha concludì ils 3 da matg 2017 e che cumpiglia il plan da zonas e plan general da furmaziun (PZ/PGF) 1:1000 "Valchava, engrondiment hotel Central".
Cun la revisiun duai vegnir stgaffida la basa per engrondir l'hotel Central. Empè da l'intenziun oriunda da realisar l'engrondiment architectonic da l'hotel Central cun ina construcziun annexa vi da l'edifizi existent, èsi ussa dentant previs da construir in edifizi nov. La vischnanca da Val Müstair n'ha fatg en quest cas ni enzonaziuns ni dezonaziuns. I sa tracta anzi da midadas da zonas entaifer las zonas da construcziun gia existentas cun vigur legala. Perquai po il PZ/PGF 1:1000 "Valchava, engrondiment hotel Central" vegnir approvà.
© Comet Photoshopping ScRL / Dieter Enz
Nova basa per il mantegniment da las vias sin il Bernina
La regenza ha approvà il project per construir la nova basa per il mantegniment da las vias da l'uffizi da construcziun bassa sin il pass dal Bernina cun cundiziuns e cun permissiuns spezialas. Dapi l'onn 2005 vegn la via chantunala sur il pass dal Bernina tegnida averta uffizialmain durant l'entir onn. Per pudair garantir il mantegniment da la via durant l'enviern dovri ina basa per il mantegniment da las vias en il sectur dal pass. Ils edifizis e las localitads che vegnan duvrads actualmain per quest intent èn en proprietad privata, èn memia pitschens e na satisfan betg pli a las pretensiuns odiernas. Gia avant in onn ha la regenza incumbensà il biro d'architectura Bearth & Deplazes da Cuira, sco victur da la concurrenza d'architectura, cun la construcziun da la nova basa per il mantegniment da las vias. Ina particularitad dal project è l'uschenumnada camera obscura sin il spitg dal silo, ch'è ina attracziun publica che po vegnir visitada. La camera obscura po vegnir visitada durant ils mais da stad ed ha potenzial turistic.
©Bearth & Deplazes architects SA
Il program da sport GKB SPORTKIDS survegn vinavant sustegn
La regenza sustegna il project GKB SPORTKIDS vinavant cun ina contribuziun or dal fond da sport. Per ils onns da trenament 2018 fin 2021 conceda ella maximalmain 450 000 francs. GKB SPORTKIDS è in program da promoziun da talents giuvens per uffants da 5 e 6 onns dal chantun Grischun ed è vegnì lantschà l'atun 2004. Il program ha la finamira da promover la motorica generala dals uffants, da cumbatter gia durant l'uffanza cunter la mancanza pli e pli gronda da moviment e da promover l'access a las uniuns da sport. Actualmain treneschan circa 630 uffants en 35 lieus da trenament.
Ulteriuras infurmaziuns davart GKB Sportkids
Gremi: regenza
Funtauna: rg chanzlia chantunala dal Grischun