Ina vaccinaziun cunter la grippa è la metoda la pli efficazia per sa proteger cunter ina malsogna virala contagiusa. Spezialmain il persunal da sanadad po proteger meglier las pazientas ed ils pazients, sch'el sa lascha vaccinar.

La grippa è ina malsogna virala contagiusa da la stagiun fraida. Spezialmain per umans cun ina ristga da cumplicaziuns pli gronda n'è la grippa betg ina malsogna nunprivlusa. La metoda la pli efficazia per sa proteger cunter la grippa e cunter eventualas cumplicaziuns è la vaccinaziun. Ella vegn recumandada a persunas cun ina ristga da cumplicaziuns pli gronda, sch'ellas avessan da pigliar ina grippa. Quai èn cunzunt persunas sur 65 onns.
Sa laschar vaccinar cunter la grippa pon tut las persunas che vulessan minimar – per motivs privats u professiunals – la ristga da pigliar ina grippa. Il cusseglier guvernativ Christian Rathgeb è per quest motiv er sa laschà vaccinar cunter la grippa a l'ospital chantunal dal Grischun.

Ils 3 da november 2017 ha lieu il di naziunal da vaccinaziun cunter la grippa da quest onn. Il di naziunal da vaccinaziun cunter la grippa porscha la pussaivladad da sa laschar vaccinar en bleras praticas da medi senza annunzia e per in pretsch pauschal cunter la grippa. Las medias ed ils medis che participeschan chattais Vus sin www.kollegium.ch/de/praevention/grippeimpftag.

Appel al persunal da sanadad
Las collavuraturas ed ils collavuraturs dals ospitals e da las chasas da persunas attempadas e da tgira han di per di contact cun persunas cun ina ristga da cumplicaziuns pli gronda. Sch'els sa laschan vaccinar cunter la grippa, na protegian els pia betg mo sasezs, mabain er las pazientas ed ils pazients respectivamain las abitantas ed ils abitants affidads ad els. Il cusseglier guvernativ Christian Rathgeb appellescha en quest senn a las collavuraturas ed als collavuraturs dals ospitals e da las chasas da persunas attempadas e da tgira da sa laschar vaccinar cunter la grippa.

Fotografia agiuntada:
Da sanestra: Dr. med. Felix Fleisch, manader da l'infecziologia, declera al cussegl guvernativ Christian Rathgeb ed ad Arnold Bachmann, parsura da la direcziun da l'ospital chantunal dal Grischun, pertge che la vaccinaziun annuala cunter la grippa vegn recumandada.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad