Cun ils programs da la SSR en tut las trais linguas chantunalas (RTR, RSI, SRF) e cun las purschidas da Radio Südostschweiz e da TV Südostschweiz dispona il Grischun oz d'ina purschida solida en il sectur da las medias electronicas. Uschia èn garantids rapports audiovisuals adequats da tut las valladas e da tut ils lieus e – sco premissa indispensabla per la furmaziun da l'opiniun democratica – ina diversitad da las funtaunas en il sectur dal schurnalissem d'infurmaziun sin plaun local, regiunal e chantunal. Gist per il Grischun cun sia diversitad linguistica, culturala, regiunal-politica, ma er economica è ina cuntrada da medias intacta da fitg gronda impurtanza – ina cuntrada da medias che accumpogna, reflectescha, ordinescha e commentescha las sfidas cuminaivlas. Sche la "iniziativa No Billag" vegniss acceptada, fissan ils rapports regiunals eliminads entaifer curt temp praticamain dal tuttafatg en tut las trais regiuns linguisticas dal Grischun. La pretensiun ch'ina purschida (quantitativamain e qualitativamain) sumeglianta sa laschia refinanziar al martgà, è absolutamain nunrealistica en chantuns muntagnards e rurals da la Svizra, cunzunt en il chantun triling Grischun.

En il passà è la regenza mintgamai s'exprimida davart projects naziunals mo, sch'il chantun era pertutgà en moda particulara. Che quai è qua il cas en moda particulara, dastgan ins senz'auter presumar. La regenza constatescha ch'il Grischun, sco sulet chantun triling, è pertutgà en moda zunt particulara da la "iniziativa No Billag". Gia ussa vuless la regenza perquai remartgar ch'ella recumonda da refusar la "iniziativa No Billag".


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch