Cun in simposi vegn terminà oz il project d'interreg da dus onns "betrifft:frauen entscheiden". En il rom dal project èn vegnidas fatgas duas retschertgas pertutgant dunnas en funcziuns da cader e da decisiun, che mussan cleramain nua ch'igl exista in basegn d'agir. La finamira dal project è stada quella d'encuraschar e da sustegnair mattas e dunnas giuvnas da s'interessar per gremis da decisiun.

Al simposi internaziunal sa participeschan la commembra da la regenza dal Vorarlberg Katharina Wiesflecker, il cusseglier guvernativ dal Liechtenstein Mauro Pedrazzini ed il cusseglier guvernativ dal Grischun Martin Jäger. En il rom dal project d'interreg ha Eva Häfele realisà las duas retschertgas "Dunnas en posiziuns da decisiun e da cader" sco er "La preschentaziun da las dunnas en posiziuns da cader en las medias". Tenor la retschertga èn dunnas anc adina sutrepreschentadas en posiziuns da decisiun e da cader, e quai en il stadi federativ Vorarlberg, en il chantun Grischun ed en il principadi da Liechtenstein. Quai mussa la retschertga voluminusa en ils trais pajais, che cumpiglia ils secturs da la politica, da l'administraziun, da l'economia, da la societad, da las medias, da la furmaziun e da la scienza, dal sport e da la cultura.
Er las datas davart la preschientscha da dunnas ed umens en posiziuns da cader en las medias, ch'èn vegnidas registradas en tschertas medias selecziunadas dals trais pajais, mussan ina clera tendenza a favur dals umens. La resumaziun da la retschertga po vegnir consultada sin www.frauenentscheiden.org.

Parlament da mattas, pitschen curs en politica, trenament da social media
Las finamiras dal project èn stadas quellas d'encuraschar mattas e dunnas en il Vorarlberg, en il Grischun ed en il Liechtenstein da s'interessar per process politics e d'augmentar la quota da dunnas en ils gremis da direcziun e da decisiun. Realisads èn vegnids in parlament da mattas transcunfinal, in pitschen curs en politica inclusiv in trenament da social media ed in tutorial davart il tema "Schlattaina en ils rapports da las medias" cun ina conferenza internaziunala successiva en la rait per collavuraturas e collavuraturs da las medias. Per augmentar la quota da dunnas en las posiziuns da cader èsi dentant necessari da tscherner ina metoda cumplessiva. Las mesiras ston vegnir rinforzadas sin trais plauns – sin il plaun individual, sin il plaun social e sin il plaun d'interpresa – per che l'access da las dunnas a posiziuns da cader e da decisiun vegnia facilità per il bain da nossa societad.


Infurmaziuns:
Tamara Gianera, manadra dal post da stab per l'egualitad da las schanzas, tel. 081 257 35 71, e-mail Tamara.Gianera@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas