La regenza ha deliberà la missiva tar ina revisiun parziala da la lescha davart las taglias communalas e las taglias da baselgia per mauns dal cussegl grond. Da nov han las vischnancas la pussaivladad d'incassar ina taxa d'alloschament empè d'ina taxa da giasts.

Per finanziar il svilup turistic incasseschan praticamain tut las vischnancas ina taxa da cura respectivamain ina taxa da giasts. L'imposiziun da la taxa als giasts sin fundament dal dumber da pernottaziuns na vegn betg pli giuditgada sco moderna e vegn tegnida per strusch controllabla. Per quest motiv pajan ils proprietaris d'immobiglias da vacanzas oz pauschalas che sa basan per exempel sin il dumber da chombras. Per simplifitgar la finanziaziun dal turissem er tar ils alloschaders e per serrar largias, propona la regenza da midar en general da la frequenza a la capacitad. Concretamain vul quai dir che la taxa na dependa betg pli da las singulas pernottaziuns dals giasts, mabain vegn calculada a maun dal dumber da chombras (hotels) u a maun dals meters quadrat surfatscha d'abitar netta (immobiglias da vacanzas). La nova taxa vegn concepida sco taxa d'alloschament. Ella è in'alternativa envers la taxa da giasts actuala. Il subject da questa taxa èn ils alloschaders e l'agen utilisader e betg pli il giast.

Las vischnancas decidan autonomamain davart l'introducziun
En la lescha chantunala davart las taglias communalas e davart las taglias da baselgia vegnan mo reglads ils princips da la taxa d'alloschament. Sch'ina vischnanca vul midar a questa nova taxa, sto ella reglar ils detagls en la lescha communala da turissem, sco ch'ella fa quai gia oz per la taxa da giasts. Ma a las vischnancas statti liber da restar tar la taxa da giasts actuala e da betg introducir la taxa d'alloschament.
Ils retgavs da la taxa d'alloschament ston vegnir duvrads per finanziar expensas en l'interess da las persunas obligadas da pajar la taxa. Per garantir quai duain las vischnancas respectivamain las organisaziuns turisticas vegnir obligadas da communitgar l'utilisaziun dals meds finanzials. Quai serva a la transparenza, senza che las vischnancas vegnissan obligadas da far insatge ch'ellas ston far e fan per part giuridicamain gia oz. Vitiers vegni che questa obligaziun da transparenza è ina mesira per stgaffir confidenza gist ord vista dals proprietaris d'abitaziuns secundaras.
La taxa per promover il turissem actuala che differentas vischnancas incasseschan d'interpresas che profitan dal turissem, n'è betg pertutgada da la nova taxa. Las vischnancas pon pia incassar – supplementarmain a la taxa d'alloschament – er en l'avegnir anc la taxa per promover il turissem.

Il cussegl grond vegn a tractar il project en la sessiun da favrer 2018.

Agiunta:
missiva


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch
- dr. iur. Toni Hess, schef dal servetsch giuridic tar l'administraziun da taglia, tel. 081 257 33 26, e-mail Toni.Hess@stv.gr.ch


Gremi: regenza
Funtauna: rg chanzlia chantunala dal Grischun