La regenza ha prendì posiziun tar il project fiscal 17 da la confederaziun ed ha deliberà ina contribuziun chantunala per engrondir il lavuratori ARBES a Giuvaulta.

La regenza s'exprima tar il project fiscal 17
La regenza ha prendì posiziun tar la revisiun dal dretg federal davart l'imposiziun da taglia sin interpresas. Ella sustegna da princip las explicaziuns da la conferenza da las directuras e dals directurs chantunals da finanzas (CDF) concernent il project fiscal 17 (PF17) e las pretensiuns formuladas là.
Spezialmain la part da la taglia federala directa fixada en moda pli bassa cumpareglià cun la refurma da l'imposiziun da taglia sin interpresas (RTI III) refusa la regenza grischuna. Il Grischun è il chantun che vegn a subir fitg grondas perditas en la gulivaziun da finanzas da la confederaziun (NGF), che na pon er betg vegnir cumpensadas da las parts pli autas vi da la taglia federala directa. Il medem mument vegnan ils chantuns obligads, da resguardar commensuradamain las consequenzas dal PF17 sin las vischnancas. Pervia da quest fatg sto la part vi da la taglia federala directa vegnir fixada almain sin 21,2 pertschient, sco che quai vegn pretendì er da la CDF. Ultra da quai pretenda la regenza grischuna che la «patent box» areguard la consequenza en la NGF vegnia concepida medemamain sco la deducziun supplementara per ils custs da perscrutaziun e da svilup.
Ils termins fitg stretgs dal PF17 chaschunan ch'ils chantuns ston prender per mauns la legislaziun executiva avant ch'il project è vegnì tractà e deliberà dal parlament federal. Uschia sto vegnir lantschada la procedura da consultaziun en il chantun Grischun avant che la missiva dal cussegl federal è avant maun. Quest proceder po esser giavischabel en vista ad ina realisaziun uschè svelta sco pussaivel dal PF17, cuntegna però er ristgas.

posiziun da la conferenza da las directuras e dals directurs chantunals da finanzas

Contribuziun chantunala a l'engrondiment dal lavuratori ARBES a Giuvaulta
L'edifizi dal lieu da lavur e d'occupaziun ARBES dals servetschs psichiatrics dal Grischun a Giuvaulta vegn engrondì ed adattà. La regenza ha ussa approvà l'engrondiment dal lavuratori 2 sco er la construcziun da plazzas da parcar. Plinavant ha ella deliberà ina contribuziun chantunala da maximalmain 1 345 360 francs.
Cun engrondir il lavuratori vegni tegnì quint da la creschientscha vertenta dal ARBES Giuvaulta. Las mesiras architectonicas cuvran il basegn da magasin, d'indrizs sanitars, da surfatscha da biro e da producziun. Las novas surfatschas da magasin distgargian er ils locals da lavur, uschia ch'ils passadis necessaris per las vias da fugia pon puspè vegnir garantids. Sco lavuratori protegì dals servetschs psichiatrics dal Grischun porscha il ARBES ina plazza da lavur ad umans creschids che han in impediment psichic.

 

Gremi: regenza
Funtauna: rg chanzlia chantunala dal Grischun