La regenza ha mess en vigur la lescha dal dretg da burgais sco er la lescha davart la promoziun da la cultura per il 1. da schaner 2018. Plinavant ha ella concedì ina contribuziun chantunala per las lavurs da sanaziun e da renovaziun dals edifizis Ospiz Chapella e Villa Gredig da la Fundaziun Chapella.

Entrada en vigur da la lescha dal dretg da burgais
La lescha chantunala dal dretg da burgais (LDBchant) dals 13 da zercladur 2017 è vegnida messa en vigur per il 1. da schaner 2018. Plinavant ha la regenza relaschà la revisiun totala da l'ordinaziun chantunala dal dretg da burgais (ODBchant). Tras la revisiun totala da la lescha chantunala dal dretg da burgais ha il chantun Grischun adattà il dretg chantunal al nov dretg federal, serrà largias ch'èn sa mussadas en la pratica ed introducì ina sistematica pli simpla. Pervia da questas midadas da la lescha èsi er stà necessari da reveder totalmain l'ordinaziun. L'ordinaziun dal dretg da burgais concretisescha e precisescha las premissas da natiralisaziun e las proceduras respectivas per acquistar u per perder in dretg da burgais communal ed il dretg da burgais chantunal.

Entrada en vigur da la lescha davart la promoziun da la cultura
La lescha davart la promoziun da la cultura (LPC) dals 15 da favrer 2017 è vegnida messa en vigur per il 1. da schaner 2018. Plinavant ha la regenza approvà la revisiun totala da l'ordinaziun davart la promoziun da la cultura (OPC). Tenor l'incumbensa dal cussegl grond è la lescha davart la promoziun da la cultura vegnida revedida totalmain. En quest rom n'è betg mo vegnida posiziunada da nov la promoziun chantunala da la cultura, mabain èn er vegnidas resguardadas las structuras novas ch'èn resultadas da la refurma dal territori. La revisiun da l'ordinaziun davart la promoziun da la cultura regla ils detagls necessaris per realisar la lescha.

Scola secundara privata internaziunala a l'Institut autalpin Ftan
La regenza ha permess da manar ina scola secundara privata internaziunala cun instrucziun d'immersiun tudestg / englais a l'Institut autalpin Ftan a partir da l'onn da scola 2018/19. L'instrucziun d'immersiun è ina metoda da l'instrucziun da linguas estras, nua ch'ina gronda part da l'instrucziun ha lieu dal cumenzament ennà en la lingua estra.
Fin ussa ha l'Institut autalpin Ftan manà ina scola secundara privata cun ina purschida voluminusa e prosperaivla da promoziun da sport. Tras l'instrucziun d'immersiun tudestg / englais pon vegnir recepids da nov en la scola privata internaziunala scolaras e scolars che derivan d'auters pajais e che han paucas u naginas enconuschientschas dal tudestg.

Studi da MMP a la SATE Cuira da nov cun examen da qualificaziun
La regenza ha approvà la revisiun parziala da l'ordinaziun davart las scolas autas purtadas dal chantun. La finamira da questa midada da l'ordinaziun è da reglar restricziuns d'admissiun per studis. Il motiv per la revisiun parziala è la dumonda da la scola auta da tecnica ed economia (SATE) Cuira da pudair introducir restricziuns d'admissiun en furma d'examens da qualificaziun. Per l'emprima giada duain quests examens vegnir applitgads per il studi d'inschigneria da medias (media engineering / multimedia production, MMP). La restricziun d'admissiun per il studi da MMP vegn motivada cun il fatg ch'il studi è permanentamain suroccupà pervia da la gronda dumonda per plazzas da studi e ch'i èn resultads temps da spetga da fin a 2 onns per studentas e students potenzials.
La regenza è pronta da decretar la restricziun d'admissiun cun procedura da qualificaziun per il studi da MMP per ils onns da studi 2018/19 fin 2021/22. La procedura da qualificaziun sto vegnir fixada dal cussegl da scola auta en in reglament.

Contribuziun chantunala per la Fundaziun Chapella
Per las lavurs da sanaziun e da renovaziun dals edifizis Ospiz Chapella e Villa Gredig ha la regenza garantì a la Fundaziun Chapella ina contribuziun da 500 000 francs. Purtada vegn la fundaziun da la vischnanca da S-chanf, da la fundaziun Bildungswerkstatt Bergwald, Thun, da la Scola auta spezialisada bernaisa per scienzas agraras, forestalas ed alimentaras, Zollikofen, e da las plaivs evangelicas da l'Engiadin'ota. La fundaziun ha l'intenziun da metter a disposiziun ils dus edifizis a las commembras da la fundaziun, ma er ad autras utilisadras ed utilisaders per scolaziuns e per furmaziuns supplementaras, per lavurs da perscrutaziun, per emnas da studi e da project e per autras occurrenzas. La Scola auta spezialisada bernaisa basegna mintgamai dal matg fin il november lieus da lavur e pussaivladads d'alloschi per sias collavuraturas e ses collavuraturs sco er per sias studentas e ses students che realiseschan là lur lavurs da master e da bachelor. La Bildungswerkstatt Bergwald ha l'intenziun da rinforzar ses center regiunal e d'engrondir la purschida en l'Engiadina ed en las vals dal sid cunfinantas. Plinavant èsi previs da promover la collavuraziun cun autras instituziuns da furmaziun e da perscrutaziun sco er cun ils manaschis forestals e cun ils uffizis locals en dumondas da la cultivaziun persistenta dal guaud e da la producziun da laina en las muntognas. Per pudair utilisar ils dus edifizis Ospiz Chapella e Villa Gredig dovri ina sanaziun ed ina renovaziun cumplessiva. Il project da sanaziun cuntegna mesiras d'isolaziun termica, la sanaziun da tetgs, il remplazzament da cuschinas, da palantschieus e d'indrizs sanitars ed electrics, la transfurmaziun da las etaschas e l'installaziun da locals da lavur, la renovaziun dals locals d'alloschi sco er mesiras da mantegniment per la ruina istorica da la baselgia.

La via da Sculms tranter Panaduz e la Val Stussavgia vegn sanada
Il project per la correcziun da la via sursilvana da la vart dretga dal Rain, Panaduz – Zault, è vegnì approvà da la regenza cun intginas permissiuns spezialas e cun intginas cundiziuns. La via da Sculms fa part da la rait chantunala da vias da colliaziun. Ella collia l'aclaun Scardanal da la vischnanca da Panaduz e l'aclaun Sculms da la vischnanca da Val Stussavgia. Il project actual cumenza a Panaduz tar il spartavias da la via sursilvana da la vart dretga dal Rain e finescha en il territori Prau Figiu.
En quest sectur è la via per part stretga. Pervia da sia capacitad insuffizienta è il vial ultra da quai donnegià e defurmà. Cun la correcziun da la via èsi previs da renovar la surstructura ed il sistem da l'allontanament da l'aua sco er da meglierar il trassé existent en las passaschas ch'èn oz memia stretgas. Tras questa renovaziun vegn augmentada la segirezza dal traffic e dal manaschi da la via da colliaziun, e la circulaziun dal traffic vegn meglierada. Ils custs totals da construcziun importan circa 2,37 milliuns francs.

 

Gremi: regenza
Funtauna: rg chanzlia chantunala dal Grischun