La via da Samignun duai vegnir renovada en etappas. Quatter tunnels, punts a spunda sco er per part in nov trassé vegnan a procurar per in augment essenzial da la segirezza d'enviern e da la segirezza dal traffic. Circa in onn e mez suenter l'emprima siglientada tradiziunala dal tunnel "Val Pischöt" po quel vegnir surdà oz al traffic sco emprima etappa da renovaziun en il rom d'ina festa.

Il cumenzament dal 20. tschientaner ha il chantun Grischun construì en etappas la via da Samignun actuala. Suenter la surdada al traffic l'onn 1912 è quella vegnida renovada u reparada mo pli punctualmain. La substanza architectonica da la via na correspunda pia betg pli a las pretensiuns dad oz envers ina via chantunala da colliaziun.

Cunzunt il traject tranter S-chalun ed Acla da Fans na cuntenta betg pli las pretensiuns dad oz concernent la ladezza e la geometria da la via. Ultra da quai è la via da Samignun exposta tant la stad sco er l'enviern a privels da la natira. Pervia da quai sto ella vegnir serrada mintgamai per plirs dis cunzunt durant ils mais d'enviern. Ina renovaziun per augmentar la segirezza dal traffic e dal manaschi è pia stada inditgada urgentamain.

En in'emprima da quatter etappas è perquai vegnì renovà il traject plain stortas, stretg e nunsurvesaivel en il territori da la Val Pischöt a custs stimads da circa 16 milliuns francs. Per cuntanscher ina segirezza dal traffic e dal manaschi uschè gronda sco pussaivel è plinavant vegnì adattà il trassé en il sectur da la galaria "Pischöt" e sviada la zona da privels da la vart da la muntogna cun il tunnel "Val Pischöt".

Ulteriuras infurmaziuns davart il tunnel "Val Pischöt" chattais Vus sin il fegl d'infurmaziun actual da l'uffizi da construcziun bassa dal Grischun.

Il nov tunnel da 325 meters lunghezza "Val Pischöt"

Il portal sid dal nov tunnel "Val Pischöt"


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Reto Knuchel, inschigner chantunal, uffizi da construcziun bassa dal Grischun, tel. 081 257 37 01, e-mail Reto.Knuchel@tba.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura