Da schaner fin avust fa il cusseglier guvernativ Christian Rathgeb ina visita a tut ils diesch ospitals regiunals dal Grischun ed a la Clinica Gut a San Murezzan. Sco gia avant dus ed avant quatter onns duain vegnir discutadas dumondas ed avisads temas actuals al lieu ensemen cun las persunas responsablas dals ospitals.
Ils ospitals regiunals èn pitgas impurtantas per il provediment da la sanadad dal chantun. En cooperaziun cun l'ospital chantunal dal Grischun garanteschan els che la populaziun da tut las parts dal chantun haja access a las prestaziuns d'ospital necessarias en il sectur dal provediment medicinal da basa, e quai entaifer in temp acceptabel ord vista medicinala e sociala.
Las visitas dal cusseglier guvernativ Christian Rathgeb permettan da discutar davart las sfidas da l'ospital respectiv e da chattar soluziuns pussaivlas. Tranter auter èn sin il program temas sco la situaziun finanziala e persunala da l'ospital. In tema central vegnan a furmar er las regiuns da provediment da la sanadad ch'il model directiv concernent l'organisaziun dal provediment da la sanadad en il chantun Grischun prenda en mira. Cunzunt il fatg da mantegnair il provediment da sanadad decentral dal chantun pretenda ina cooperaziun pli intensiva tranter ils furniturs da prestaziuns instituziunals. En il rom dal barat vuless il cusseglier guvernativ Christian Rathgeb medemamain sa laschar infurmar davart il stadi da questa collavuraziun tranter ils furniturs da prestaziuns en las regiuns. In ulteriur punct impurtant sin l'agenda vegnan ad esser las consequenzas per ils ospitals regiunals da dumbers minimals da cas che la confederaziun ha l'intenziun d'introducir.
Sin sias visitas vegn Christian Rathgeb accumpagnà da ses collavuraturs ils pli stretgs, Nicola Katharina Kull, secretaria dal departament, e Rudolf Leuthold, manader da l'uffizi da sanadad. Gia ils 31 da schaner vegnan ad avair lieu sco emprim inscunters cun l'ospital da l'Engiadina bassa a Scuol e cun la Clinica Gut a San Murezzan. Collavuraturas e collavuraturs da las medias han la pussaivladad da far dumondas al cusseglier guvernativ Christian Rathgeb ed a las persunas responsablas per ils ospitals suenter las visitas dals ospitals. L'invitaziun succeda mintgamai tras ils ospitals regiunals.
Survista da las visitas als ospitals:
| ospital da l'Engiadina bassa, Scuol |
31 da schaner 2018 |
| clinica Gut, San Murezzan |
31 da schaner 2018 |
| ospital San Sisto, Puschlav |
2 da favrer 2018 |
| ospital da Tusaun |
9 da favrer 2018 |
| ospital da la Surselva, Glion |
16 da favrer 2018 |
| ospital da la Bregaglia, Promontogno |
23 da favrer 2018 |
| ospital da la Val Müstair, Sta. Maria |
2 da mars 2018 |
| ospital da Schiers |
13 d'avrigl 2018 |
| ospital da Tavau |
25 d'avrigl 2018 |
| ospital dal Surses, Savognin |
27 d'avrigl 2018 |
| ospital da l'Engiadin'ota, Samedan |
17 d'avust 2018 |
Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Rudolf Leuthold, manader da l'uffizi da sanadad, tel. 081 257 26 41, e-mail Rudolf.Leuthold@san.gr.ch
- Nicola Katharina Kull, secretaria dal departament da sanadad, tel. 081 257 25 12, e-mail Nicola.Kull@djsg.gr.ch
Gremi: departament da giustia, segirezza e sanadad
Funtauna: rg departament da giustia, segirezza e sanadad