La cuminanza da lavur da las regiuns alpinas (ARGE ALP) ha surpiglià il patrunadi per ils "Discurs davart la perscrutaziun da l'energia Mustér 2018" e sustegna questa occurrenza cun 5000 euros. A partir dad oz fin venderdi ha lieu en la claustra benedictina a Mustér il barat tranter perscrutadras e perscrutaders en il sectur da l'energia.

La ARGE ALP surdat fin dus patrunadis per onn per occurrenzas e projects senza finamira da rendita che han – tras la collavuraziun transcunfinala – l'intent da rinforzar ils interess cuminaivels dals stadis commembers, da promover ils contacts tranter lur burgaisas e burgais e da prestar ina contribuziun a favur da l'integraziun europeica. La surpigliada dal patrunadi è colliada cun in sustegn finanzial da 10 pertschient dals custs totals, dentant da maximalmain 5000 euros.

Perscrutaziun da l'energia per ils chantuns da muntogna
Quest onn surpiglia la ARGE ALP il patrunadi dals "Discurs davart la perscrutaziun da l'energia Mustér 2018". Gia per la terza giada organisescha la fundaziun Center da perscrutaziun d'energia alpin (AlpEnForCe) questa dieta specifica. La fundaziun è vegnida stabilida il cumenzament da l'onn 2016 per promover la perscrutaziun interdisciplinara da l'energia a l'avantatg dals chantuns da muntogna e d'ulteriuras regiuns alpinas. La fundaziun s'occupa da dumondas tecnicas, economicas, giuridicas e politicas en connex cun l'energia en il territori alpin e collavura tant cun instituziuns da perscrutaziun naziunalas ed internaziunalas sco er cun partenaris da la pratica.

Participantas e participants da l'entir territori da la ARGE ALP
L'occurrenza che ha lieu annualmain dapi l'onn 2016 ha la finamira da promover in barat internaziunal ed interdisciplinar en il sectur da l'energia tranter perscrutadras e perscrutaders da tut l'Europa. Ma l'occurrenza na sa drizza betg mo a scienziadas ed a scienziads, mabain er ad in vast public che s'interessa per temas d'energia. L'occurrenza ha lieu ina giada per onn mintgamai durant trais dis en las localitads da la claustra benedictina a Mustér. D'ina vart sa cumpona ella da singulas sessiuns da perscrutaziun e da l'autra vart d'ina occurrenza publica.
Quest onn vegnan spetgads passa 100 participantas e participants a las sessiuns da perscrutaziun, circa la mesadad dad ellas ed els deriva dal territori da la ARGE ALP. A l'occurrenza publica vegni quintà cun var 200 persunas.

Program dals "Discurs davart la perscrutaziun da l'energia Mustér 2018"

Propostas da soluziun per il territori alpin
La finamira da la ARGE ALP da tractar – tras la collavuraziun transcunfinala – problems ed interess cuminaivels, cunzunt dal champ ecologic, cultural, social ed economic, vegn sustegnida cumplainamain dals "Discurs davart la perscrutaziun da l'energia Mustér". I correspunda al model directiv da la fundaziun AlpEnForCe da tschertgar sin basa internaziunala ed interdisciplinara soluziuns per problems. Plinavant porschan las enconuschientschas dals "Discurs davart la perscrutaziun da l'energia Mustér" ina basa per ulteriurs projects da cooperaziun regiunals e transcunfinals.


Infurmaziuns:
chancelier Daniel Spadin, chanzlia chantunala dal Grischun, tel. 081 257 22 23, e-mail Daniel.Spadin@staka.gr.ch


Gremi: ARGE ALP / chanzlia chantunala dal Grischun
Funtauna: rg ARGE ALP / chanzlia chantunala dal Grischun