La regenza ha approvà in project per renovar la via dal Scanvetg tar Maladers. Ultra da quai ha ella dà glisch verda per lavurs da sanaziun vi dal mir da fermada Solas.

Sanaziun da la via dal Scanvetg tar Maladers
La regenza ha approvà in project per renovar la via dal Scanvetg, spartavias Maladers fin Platz, cun intginas cundiziuns sco er cun permissiuns spezialas. Sin il traject da circa 680 meters è la via stretga ed ha intgins obstachels laterals. Ultra da quai na correspunda la via betg pli a las pretensiuns dad oz concernent la survesaivladad, ils radius da las stortas e la ladezza da la via. Perquai che sia surstructura n'è betg resistenta a la schelira, è il vial donnegià ed ha defurmaziuns. La renovaziun planisada prevesa da reparar la surstructura sco er da meglierar la geometria da la via en ils secturs stretgs e nunsurvesaivels. Ils custs totals da quest project importan circa 9,1 milliuns francs.

©Uffizi federal da topografia

Sanaziun dal mir da fermada Solas
La regenza ha concedì l'approvaziun dal project per sanar il mir da fermada Solas da l'ovra electrica da la citad da Turitg (ewz). Il mir da fermada Solas è en funcziun dapi l'onn 1986 sco accumulatur da di per las ovras electricas da Seglias e da Giuvaulta. La ewz prevesa da far inspecziuns e sanaziuns vi dal mir da fermada, particularmain da la protecziun cunter corrusiun dals sculs da basa e da la svidera al funs dal lai sco er dals tumbins, nua che l'aua turbinada entra en las galarias. Ultra da quai duai vegnir augmentà il conduct d'aua da dotaziun, per evitar ch'el vegnia bloccà cun sediments fins. Per far questas lavurs èsi necessari da svidar il lai. Las lavurs èn previsas per il favrer e mars 2019.

©Ovra electrica da la citad da Turitg


Gremi: regenza
Funtauna: rg chanzlia chantunala dal Grischun