A San Bernardino ha gì lieu dacurt la scuntrada da las direcziuns da sanadad dals chantuns Tessin e Grischun. En quest connex han ils cussegliers guvernativs Christian Rathgeb e Paolo Bertraminelli cun lur delegaziuns discutà differents temas actuals.

Tuttas duas delegaziuns han confermà cun questa chaschun la buna collavuraziun tar la furniziun da prestaziuns en ils secturs dals fatgs da salvament e dal provediment cun ospitals tras il chantun Tessin a favur da pazientas e pazients da la Mesolcina e da la Val Calanca. L'organisaziun d'acziun cuminaivla en cas d'eveniments gronds sco er il care team che vegn mess a disposiziun dal chantun Tessin per questas duas vals grischunas da lingua taliana èn er vegnids tematisads.

Regiuns perifericas en il focus
Dumondas da princip da l'organisaziun da la politica da sanadad dals chantuns han furmà in ulteriur punct central, en spezial il barat d'experientschas davart il provediment da la sanadad en las regiuns perifericas. Il sistem da provediment integrà cun differents acturs dals fatgs da sanadad ch'il chantun Grischun realisescha e pratitgescha cun success dapi onns è stà da grond interess per ils represchentants tessinais.

Il provediment da la sanadad è chaussa dals chantuns
Ils dus cussegliers guvernativs èn da l'avis ch'i stoppia vegnir fatg frunt energicamain a la tendenza da la confederaziun d'intervegnir adina pli savens en la suveranitad dals chantuns en cas dal provediment da la sanadad. Ultra da quai ston las organisaziuns decentralas vegnir promovidas vinavant a favur da la segirezza e da la sanadad. Plinavant èn tuttas duas delegaziuns da l'avis che la collavuraziun cuminaivla stoppia vegnir approfundida vinavant e che las structuras sumegliantas dals chantuns stoppian vegnir duvradas sco basa per in ulteriur barat regular.

La delegaziun dal Grischun: cusseglier guvernativ Christian Rathgeb, Nicola Katharina Kull (secretaria dal departament), Rudolf Leuthold (manader da l'uffizi da sanadad), Martin Bühler (manader da l'uffizi da militar e da protecziun civila)

La delegaziun dal Tessin: cusseglier guvernativ Paolo Beltraminelli, Paolo Bianchi (directur da la partiziun "sanadad publica"), Giorgio Merlani (medi chantunal), Ivana Petraglio (manadra dal sectur "direcziun/adminstraziun dals fatgs da sanadad")

Fotografia:

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad