Sut il titel "Vias or da la depressiun" publitgescha l'uffizi da sanadad dal Grischun ina concurrenza creativa. Fin ils 13 da zercladur 2018 èn persunas pertutgadas envidadas a preschentar lur vias or da la depressiun en maletgs ed en fotografias.

Depressiuns tutgan tar las malsognas psichicas las pli frequentas. Entaifer in onn survegnan var 7 pertschient da la populaziun in disturbi psichic. L'organisaziun mundiala da la sanadad (WHO) stima che la depressiun vegn ad esser l'onn 2030 la malsogna la pli derasada, avant las malsognas dal cor e da la circulaziun.
Ina depressiun ha bleras fatschas ed expressiuns. La concurrenza creativa porscha a las persunas pertutgadas ina plattafurma per s'exprimer e per infurmar, co ch'ellas han chattà la via or da la malsogna. Uschia duain vegnir ruts si tabus e reducidas resalvas. Ils purtaders da questa concurrenza èn l'uffizi da sanadad dal Grischun, ils servetschs psichiatrics dal Grischun (SPGR) e la psichiatria d'uffants e da giuvenils dal Grischun (PUG).

Las ovras pon vegnir inoltradas fin ils 13 da zercladur 2018 a l'uffizi da sanadad dal Grischun. Ina giuria che sa cumpona da represchentantas e represchentants da las instituziuns purtadras, dal fotograf Nicola Pitaro e da la co-directura dal museum d'art dal Grischun, Nicole Seeberger, tscherna alura las meglras ovras. Ils victurs survegnan pretschs en la valur totala da 2000 francs e daventan ina part da l'exposiziun "Vias or da la depressiun", che vegn averta ils 6 da settember 2018 per lantschar ils dis d'acziun grischuns per la sanadad psichica a Cuira. Ulteriuras infurmaziuns e las cundiziuns da participaziun èn publitgadas sut www.bischfit.ch.

"I pertutga nus tuts" - Dis d'acziun per la sanadad psichica
La concurrenza creativa è ina part dals dis d'acziun per la sanadad psichica che l'uffizi da sanadad dal Grischun organisescha gia per la terza giada ensemen cun partenaris. Sut il motto "I pertutga nus tuts" han lieu dals 6 da settember fin ils 10 d'october 2018 en l'entir chantun occurrenzas davart il tema "sanadad psichica". La retscha d'occurrenzas envida tuttas e tuts a vegnir a savair, co ch'ins mantegna la sanadad psichica e co ch'ins fa frunt a squitschs ed a crisas.

Agiunta:
Fegl sgulant da la publicaziun da la concurrenza creativa


Infurmaziuns:
Denise Rudin, uffizi da sanadad, manadra da partiziun, tel. 081 257 64 08, e-mail Denise.Rudin@san.gr.ch


Gremi: uffizi da sanadad dal Grischun
Funtauna: rg uffizi da sanadad dal Grischun