A Dalvazza ha l'uffizi da construcziun bassa dal Grischun, district 5, inaugurà uffizialmain la nova basa per il mantegniment da las vias. Il nov edifizi modern unescha tut ils basegns sut in tetg.

L'uffizi districtual da construcziun bassa 5 Tavau è responsabel per la tgira da la rait da vias chantunalas sco er per il mantegniment funcziunal da la via naziunala N28 en il Partenz. Cun la basa per il mantegniment da las vias a Dalvazza (vischnanca da Luzein) cun tut en tut 9 collavuraturs vegn garantì il mantegniment da totalmain 78 kilometers via. Da quels tutgan 20 kilometers a la via naziunala N28 dal Fuchsenwinkel fin a Claustra/Selfranga e 58 kilometers a la via chantunala da colliaziun che collia las numerusas fracziuns cun l'axa principala.

Tut sut in tetg
La basa per il mantegniment da las vias existenta a Fideris na correspunda betg pli a las pretensiuns actualas areguard la grondezza, areguard la realisaziun architectonica ed areguard l'equipament tecnic. Er il silo da sal existent cumpiglia mo ina part dal volumen necessari. Per motivs da plazza n'è in engrondiment al lieu existent betg stà pussaivel.

Suenter l'avertura dal sviament da Küblis l'onn 2016 ha pudì vegnir cumenzà cun las lavurs preparatoricas per la nova basa per il mantegniment da las vias sin l'areal da l'anteriur plazzal da tunnel. Sa basond sin il concept da gestiun cumprovà e sin il program da spazi da l'uffizi da construcziun bassa ha pudì vegnir realisada e terminada entaifer in onn e mez ina construcziun da lain simpla ed adequata. La halla da parcar per ils vehichels, la lavandaria, las localitads da deposit sco er ils locals da segiurn e la gardaroba per ils collavuraturs èn unids sut in tetg. Cumplettà vegn l'edifizi da manaschi cun in stabiliment da deposit al liber, in silo per 400 tonnas sal, in indriz per preparar aua da sal cun in volumen da 20 000 liters sco er in center da rimnada per lozza da via.

Nov edifizi modern
Il stabiliment sa distingua tras ina moda da construcziun funcziunala e persistenta e tras furmas cleras. L'edifizi da lain integral ademplescha autas pretensiuns energeticas tenor il standard da MINERGIE e dispona d'in stgaudament da pellets. Il lain duvrà per la construcziun deriva directamain da l'autra vart da la val ed è vegnì elavurà en la scrinaria vischina. L'edifizi nov a Dalvazza correspunda a las pretensiuns d'ina basa per il mantegniment da las vias moderna e facilitescha als collavuraturs da l'uffizi da construcziun bassa la lavur quotidiana sin via.

Grazia a l'engaschi ed a la collavuraziun excellenta tranter il patrun da construcziun, ils planisaders, ils interprendiders e la vischnanca han pudì vegnir realisadas cun success las finamiras dal project areguard la qualitad, areguard ils custs ed areguard ils termins. Ils custs budgetads da 5,3 milliuns francs per la nova basa per il mantegniment da las vias han pudì vegnir observads. L'uffizi federal da vias UVIAS sa participescha cun 69 pertschient (interessenza da vias naziunalas) als custs da construcziun.

Fotografias agiuntadas:

 

 

Infurmaziuns:
- Markus Dünner, architect chantunal, uffizi da construcziun auta, tel. 081 257 36 31, e-mail Markus.Duenner@hba.gr.ch
- Reto Knuchel, inschigner chantunal, uffizi da construcziun bassa, tel. 081 257 37 01, e-mail Reto.Knuchel@tba.gr.ch


Gremi: uffizi da construcziun auta
Funtauna: rg uffizi da construcziun auta