L'uffizi per la natira e l'ambient (UNA) ha fatg examinaziuns pertutgant la substanza organica nuschaivla PCB en tut ils flums da val gronds dal chantun Grischun. Il motiv per quai è stada la contaminaziun cun PCB dal Spöl sura ch'è vegnida scuvrida suenter in incap durant las lavurs da sanaziun vi dal mir da serra Punt dal Gall. Ussa èn avant maun ils resultats da las mesiraziuns.

Tut en tut èn vegnids examinads 27 lieus areguard PCB. En l'aua dal Spöl sura èn vegnidas mesiradas sco spetgà las valurs las pli autas. Tar ils ulteriurs flums èn vegnidas constatadas concentraziuns pli autas en il Rain anteriur sut Glion, en la Plessur sur Langwies tar Litzirüti ed en l'En sut Martina. Tar ils auters trajects examinads èn las valurs mesiradas stadas sin in nivel bass. En ils trajects d'aua, en ils quals èn vegnidas chattadas valurs da PCB pli autas, vegnan fatgas examinaziuns cumplementaras en il decurs da l'onn 2018.

Tut las infurmaziuns davart ils resultats da las mesiraziuns e davart ulteriuras mesiras necessarias chattais Vus sin la pagina d'internet da l'uffizi per la natira e l'ambient.


Infurmaziuns:
Remo Fehr, manader da l'uffizi per la natira e l'ambient, tel. 081 257 29 41, e-mail Remo.Fehr@anu.gr.ch


Gremi: uffizi per la natira e l'ambient
Funtauna: rg uffizi per la natira e l'ambient