In Cama wird heute mit dem Spatenstich die Baustelle für die neue Wildannahmestelle der Region (Zentrum Jagd Mesolcina) eröffnet.

L'uffizi da chatscha e pestga ch'è responsabel per la surveglianza da chatscha en il chantun Grischun, survegn in nov post da recepziun da selvaschina en il district da chatscha 4, Moesa. En il post da recepziun da selvaschina vegn controllada la selvaschina che vegn sajettada durant la chatscha u da la surveglianza da chatscha sco er la selvaschina disgraziada en accidents da traffic. Il local che stat a disposiziun oz per questas incumbensas n'ademplescha betg pli las pretensiuns envers l'igiena e la grondezza.

Engrondiment d'in edifizi existent
A Cama, sin territori dal chantun, nua ch'i sa chatta il stabiliment per l'allevament da peschs, vegn cumplettà in edifizi annex ch'è caracteristic per la regiun, cun ina nova part d'in edifizi. Sin la via d'avertura existenta cuntanschan ins fitg bain il post da recepziun da selvaschina ch'è dentant a medem temp er separà dal manaschi da l'allevament da peschs. Il program da las localitads cumpiglia in local da selvaschina, ina cella da sfradentar, in biro sco er ina tualetta ed ina gardaroba.

In center da chatscha per la regiun Mesolcina
Las fitg variadas incumbensas dals survegliaders da chatscha pon vegnir concentradas en il nov center da chatscha ed ademplidas sut cundiziuns optimalas. La selvaschina po vegnir transferida directamain dal vehichel en il local da selvaschina, nua ch'ella vegn visitada. En la cella da sfradentar gist annexa pon plirs animals vegnir depositads durant in temp pli lung. Per las incumbensas administrativas, sco la vendita da patentas da chatscha, la controlla da las armas, la recepziun da denunzias e la consegna da permissiuns, stat a disposiziun in biro generus cun tualetta e gardaroba.

Las lavurs da construcziun duran fin la fin d'avust 2018 e vegnan pia ad esser terminadas avant ch'i cumenza la chatscha.
 
Fotografias agiuntadas:

 

Infurmaziuns:
- president da la regenza dr  Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch
- Gion Darms, substitut da l'architect chantunal, uffizi da construcziun auta, tel. 081 257 36 32, e-mail Gion.Darms@hba.gr.ch
- dr. Adrian Arquint, manader da l'uffizi da chatscha e pestga, tel. 081 257 38 91, e-mail Adrian.Arquint@ajf.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura