Confurm a sia strategia d'immobiglias vul il chantun realisar in center regiunal er per l'Engiadin'ota e la Bregaglia. La polizia chantunala e 12 ulteriurs servetschs duain vegnir concentrads tar la staziun da Samedan. Uschia po la lavur administrativa vegnir organisada en moda pli effizienta ed ils custs per las localitads pon vegnir reducids duraivlamain.

La creaziun d'in center administrativ a Samedan è part da la strategia chantunala d'immobiglias ch'il chantun persequitescha dapi l'onn 2006. Quella prevesa da furmar totalmain nov centers regiunals ferms ch'èn repartids sin l'entir chantun. Sis centers administrativs regiunals èn gia en funcziun a Glion, Landquart, Roveredo, Scuol, Tavau e Tusaun. Mancar mancan – ultra da Cuira, nua ch'ins è londervi da construir l'emprima etappa dal center administrativ "sinergia" – anc centers regiunals a Samedan e Puschlav.
En in proxim pass duain las plazzas da lavur a Samedan, ch'èn repartidas sin 13 differents lieus, vegnir staziunadas en in edifizi nov sin l'areal actual da la Viafier retica. Per quest intent suttascrivan il chantun e la Viafier retica in contract preliminar davart l'acquist da terren. En il rom d'ina evaluaziun precedenta dal lieu ha quest bain immobigliar, ch'è situà directamain a la staziun, cuntanschì il meglier resultat. Cun 120 plazzas da lavur daventa Samedan il segund grond center regiunal dal chantun suenter Cuira.


© RhB

13 servetschs en in lieu central
11 posts da servetsch chantunals sco er dus posts externs d'instituts da dretg public duain furnir a Samedan lur servetschs per las burgaisas ed ils burgais en l'avegnir en in nov center regiunal sut in tetg. En spezial vegnan ad esser represchentads là la polizia chantunala, la procura publica, l'autoritad per la protecziun d'uffants e da creschids, il servetsch social, l'intermediaziun regiunala da lavur, la cussegliaziun da professiun, da studi e da carriera, il servetsch psicologic da scola, l'uffizi per la valitaziun d'immobiglias, l'administraziun da taglia, l'uffizi per la segirezza da victualias e per la sanadad d'animals, l'uffizi da guaud e privels da la natira sco er l'assicuranza d'edifizis dal Grischun e l'institut d'assicuranza sociala. Otg da quests servetschs èn staziunads gia oz a Samedan.

Collavuraziun pli effizienta e damain custs per las localitads
Il center administrativ a Samedan remplazza tut en tut 16 relaziuns da locaziun e dus agens objects. Quels satisfan mo pli parzialmain als basegns da manaschi, da la clientella e da segirezza d'ozendi e na pon per gronda part betg vegnir meglierads prospectivamain, er betg cun investiziuns considerablas. Tras questa reducziun dal dumber d'objects e da contracts da locaziun sa diminueschan ils custs per la tgira dals edifizis e per l'informatica. Ultra da quai èsi pussaivel da sbassar il consum d'energia e da remplazzar ils carburants fossils. Grazia a la concentraziun pon er ils andaments da manaschi vegnir concepids en moda pli effizienta, e la collavuraziun tranter ils posts da servetsch daventa pli simpla.

Concentraziun da las forzas d'acziun da la polizia
Sco utilisadra la pli gronda da l'edifizi vuless la polizia chantunala unir en il nov center administrativ a Samedan sias 50 collavuraturas e collavuraturs da la regiun. Uschia èsi pussaivel da concentrar las forzas d'acziun da la polizia chantunala sco er d'augmentar la preschientscha poliziala a favur da la segirezza da la populaziun da l'Engiadin'ota e da la Bregaglia. Tras l'infrastructura moderna e tras ils meds d'acziun che stattan oz a disposiziun po la polizia chantunala intervegnir en moda cumplessiva e svelta en la regiun Malögia. Medemamain represchentada en l'edifizi è plinavant la procura publica.

Project sco part dal program d'impuls regiunal da la regenza
En il Grischun sa sviluppa l'economia actualmain en moda pauc dinamica e cun differenzas marcantas entaifer il chantun. Il chantun vul perquai sustegnair cun clers impuls las regiuns perifericas en lur stentas da rinforzar ils centers regiunals e da crear cundiziuns generalas favuraivlas per l'economia indigena. En quest connex è il center administrativ, che vegn mess a disposiziun a Samedan, in element dal punct central da svilup "program d'impuls da la regiun per la regiun en il sectur da l'infrastructura" dal plan da finanzas dal chantun 2018-2020.
Ils custs previsibels per acquistar il terren e per construir il nov center administrativ importan anc var 21 milliuns francs suenter la vendita da las immobiglias existentas. Plinavant crodan davent mintga onn custs da locaziun periodics da stgars 0,5 milliuns francs.

Stretga collavuraziun cun la Viafier retica
Il nov center regiunal duai vegnir construì en stretga coordinaziun cun la Viafier retica. La Viafier retica vul medemamain planisar e realisar a medem temp in project immobigliar sin l'areal da la viafier per cumplettar la purschida d'utilisaziuns orientadas a la staziun. La Viafier retica e la vischnanca da Samedan vegnan ussa a preparar in plan d'areal per sviluppar l'entir perimeter dal project. Quest plan duai vegnir deliberà l'atun. Il chantun e la Viafier retica vegnan ad eruir il project il pli adattà cun agid d'ina concurrenza da planisaziun. En cas d'in andament optimal da las proceduras da planisaziun e da permissiun sin plaun communal e chantunal e premess ch'il pievel grischun dettia ses consentiment, cumenzan las lavurs da construcziun la primavaira 2022 ed il center administrativ po vegnir avert la primavaira 2025.


Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala