Il departament d'economia publica e fatgs socials (DES) vul accelerar l'avertura dal Grischun cun bindel ultralad. La finamira è quella ch'il Grischun occupia ina plazza a la testa en cumparegliaziun cun l'ulteriura Svizra. L'uffizi per economia e turissem (UET) lavura ensemen cun il DES e cun experts vi d'in concept da basa che cuntegna propostas da soluziun per meglierar il provediment da las regiuns cun in internet svelt. Uschia duain las IPM ed il turissem survegnir ina colliaziun che tegna quint dals basegns. Quai è ina premissa essenziala per augmentar l'abilitad d'innovaziun.

Per incumbensa dal DES ha la SATE a Cuira – sut la batgetta da prof. Ulrich Hauser – examinà l'avertura cun bindel lad en il Grischun. Uschia è vegnida ademplida ina pretensiun da l'incumbensa Casanova-Maron concernent in "Grischun digital". Tar la rait per ils telefonins è la cuvrida cun la tecnologia 4G levamain sut la media svizra. Ins po però far quint che quest retard vegnia reducì constantamain e che la cuvrida cun 4G dastgia esser oz – sco en il rest da la Svizra – quasi 100 pertschient. En cas da la rait fixa cun bindel lad è la cuvrida en il Grischun ed en Svizra cun quasi 100 pertschient da las chasadas er fitg buna. Tar il provediment cun bindel ultralad a partir da 100 mbit/s ha il Grischun però in retard envers l'entira Svizra.

Provediment da las regiuns cun bindel (ultra)lad che tegna quint dals basegns
Il DES fa quint ch'ils basegns da las IPM e dal turissem envers la qualitad d'avertura vegnian a crescher en las regiuns. Perquai sa stenta il DES da dar al chantun Grischun ina plazza a la testa dal provediment cun bindel ultralad cumpareglià cun la media naziunala. Areguard l'avertura ed areguard las cundiziuns sto il chantun pudair concurrer cun las regiuns metropolitanas da la Svizra. En il center stat ina purschida da bindel ultralad che tegna quint dals basegns e ch'è abla per l'avegnir. Las IPM grischunas ed il turissem grischun duain uschia augmentar lur cumpetitivitad e lur abilitad d'innovaziun.

Dar impuls a l'economia regiunala
Ina gruppa externa d'experts (gruppa da project "Bindel lad GR") sut la direcziun dal UET è londervi da sviluppar in concept da basa cun propostas da soluziun per proveder las regiuns cun bindel ultra lad. Quel furnescha la basa per elavurar ina strategia da promoziun che duai dar impuls a l'economia regiunala. Ils princips strategics èn definids cleramain: Il focus sa chatta sin IPM che dovran las colliaziuns per grondas quantitads da datas. En ina proxima fasa duai vegnir sclerì tranter auter nua ch'i dat largias en l'avertura, co che quellas pon vegnir serradas e co ch'il chantun po sustegnair subsidiarmain las regiuns e las vischnancas. Da princip duai vegnir mantegnì il primat da l'engrondiment che vegn dumandà dal martgà e che tegna quint dals basegns.
Cun elavurar quest concept da basa per l'avertura cun bindel lad cuntinuescha il DES sias lavurs da blers onns ch'el ha fatg en quest sectur e che han cumenzà cun l'elavuraziun da duas analisas da la situaziun concernent l'avertura cun bindel lad realisada da l'uffizi per il svilup dal territori durant ils onns 2010 e 2012. En il rapport davart il svilup economic en il chantun Grischun e – sco consequenza da quai – en la revisiun da la lescha chantunala per il svilup economic è l'avertura er vegnida resguardada.

In sguard en il lavuratori
Tenor la gruppa da project "Bindel lad GR" ch'è vegnida incumbensada d'elavurar propostas da soluziun per proveder las regiuns cun bindel ultra lad èsi central da differenziar tranter ils differents nivels da rait. In concept concernent il provediment cun bindel lad sto resguardar – ultra da las raits sin il plaun da las regiuns e da las vischnancas – er las raits fixas. Il basegn d'agir po divergiar en quest connex da regiun a regiun. Il chantun sustegna las regiuns ad analisar lur basegns e metta a disposiziun las resursas e las cumpetenzas ch'èn necessarias per quai.

Il rapport da la SATE "Breitband und digitale Transformation: Breitbanderschliessung im Kanton Graubünden" po vegnir consultà sin la pagina d'internet dal DES.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: departament d'economia publica e fatgs socials
Funtauna : rg departament d'economia publica e fatgs socials