La regenza prenda enconuschientscha cun indignaziun dals resultats da l'inquisiziun da la cumissiun da concurrenza (CUMCO) tar las cunvegnas da submissiun en l'Engiadina bassa. Ella è consternada da la dimensiun e condemna en tutta furma las cunvegnas davart ils pretschs.

La CUMCO ha communitgà oz a las medias ch'ella haja terminà in'ulteriura inquisiziun concernent il dretg da cartels en il chantun Grischun e ch'i sajan vegnidas pronunziadas per part grondas multas en quel connex. Ella ha constatà che interpresas da construcziun hajan fatg en differents cartels cunvegnas davart pliras tschient submissiuns en il sectur da la construcziun auta e bassa. Ils cartels pertutgavan submissiuns dal chantun Grischun, da vischnancas da l'Engiadina bassa e da persunas privatas. Las valurs da las incumbensas tanschan tenor la communicaziun da la CUMCO da paucs dieschmilli fin a plirs milliuns francs Il chantun, las vischnancas pertutgadas ed er las persunas privatas èn probablamain vegnidas donnegiadas considerablamain. La regenza è consternada da la dimensiun da quests embrugls. Cunvegnas davart ils pretschs èn illegalas e betg tolerablas.

Il chantun sancziunescha las firmas culpaivlas
Per defender ils interess dal chantun sco empustader da prestaziuns da construcziun ed ils dretgs dal chantun sco donnegià potenzialmain ha il chantun dumandà la CUMCO da pudair prender invista da las actas gia tar las decisiuns da la CUMCO prendidas pli baud. La dumonda da prender invista da las actas è pendenta. Er en questa ultima procedura n'è il chantun betg partida da procedura. Pervia da quai vegn el a dumandar la CUMCO invista da las actas er en quest cas. Il chantun ha pretendì ed ha survegnì da las interpresas da construcziun pertutgadas da renunziar a l'objecziun pervia da surannaziun. Suenter avair prendì invista da las actas da procedura vegn il chantun ad examinar tut ils pass tenor il dretg da submissiun, civil e penal e da proceder giuridicamain cunter las firmas culpaivlas. En cas d'ina disposiziun legalmain valaivla da la CUMCO èn gia vegnidas pronunziadas dal chantun emprimas sancziuns tenor il dretg d'acquisiziuns il cumenzament da l'onn 2018. Questa decisiun n'ha betg anc vigur legala.

Il chantun optimescha ils andaments interns
Immediatamain suenter la communicaziun da las inquisiziuns da la CUMCO l'onn 2012 ha il chantun prendì las mesiras necessarias per proteger ils interess dal chantun vi d'ina procedura da surdada correcta. Il departament da construcziun, traffic e selvicultura (DCTS) ha sviluppà in sistem da monitoring per pussibilitar als survegliaders da la concurrenza d'intervegnir apaina ch'i dat suspects da cunvegnas da submissiun. Il medem mument è vegnì installà in post da consultaziun tar il DCTS per annunziar anonimamain cunvegnas da submissiun. Ulteriuras mesiras sco furmaziuns supplementaras internas, glistas da controlla e.u.v. èn er ina part dal pachet da mesiras. Segund il stadi da las enconuschientschas vegnan las mesiras adattadas permanentamain. La situaziun survegn vinavant l'attenziun la pli gronda.


Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala dal Grischun