Sin il pass dal Bernina cumenzan oz – cun l'emprima badigliada – las lavurs da construcziun per la nova basa per il mantegniment da las vias da l'uffizi da construcziun bassa dal Grischun, district 3.

La construcziun nova da la basa per il mantegniment da las vias permetta da meglierar considerablamain las relaziuns localas e las premissas per in servetsch da mantegniment da las vias effizient ed economic sin la via dal pass dal Bernina. Ina part essenziala vegn a contribuir er il silo cun in volumen da 475 meters cubic per depositar sal e crapella.

La via chantunala sur il pass dal Bernina, cun in punct culminant da 2328 meters sur mar, collia la Val Puschlav cun l'Engiadin'ota. Fin ils onns 1960 era la via da princip serrada durant l'enviern. Suenter l'onn 1965 eran las vischnancas da Brusio e da Puschlav autorisadas da tegnair avert la via dal pass durant l'entir onn per il traffic motorisà. Dapi la primavaira 2007 è l'uffizi da construcziun bassa dal Grischun, district 3, cumpetent e responsabel per l'entir mantegniment da la via dal pass dal Bernina. Per in mantegniment da la via effizient mancan oz locals moderns.

Tractament sensibel da la cuntrada
Il territori, sin il qual vegn construida la nova basa per il mantegniment da las vias, fa part d'in dals 12 patrimonis mundials da la UNESCO en Svizra, ed il plazzal cunfinescha cun la zona da plimatsch fixada da la UNESCO. Il project dal biro d'architectura Bearth & Deplazes, Cuira, ha gudagnà ina concurrenza e fa prova d'ina confruntaziun intensiva cun la cuntrada. Tractar sensiblamain la natira è la basa dal sboz ed in element dal project. Ina fatschada ondulada da betun natiral e la tur dal silo che stat suletta vegnan a definir da nov il lieu sin la via dal pass dal Bernina curt avant ses punct culminant. La sutdivisiun da l'edifizi en furma da lenta s'adatta optimalmain en ina part existenta da la cuntrada. Tut ils locals che sa chattan davos la fatschada ondulada, èn cuvrids cun terra, uschia ch'i vegn pussibilità da renatiralisar il lieu.

Bain organisà per il diever
Tut la basa per il mantegniment da las vias vegn organisada sin in plaun. Il plan sa sviluppa da la fatschada ondulada en in radius entaifer il munt e sa sutdivida uschia. Ils locals furman ina retscha en dependenza da lur diever: deposit da gas, alloschi dal manaschi 1, magasin, lavandaria d'autos, silo, hallas da parcar, local da segiurn, alloschi dal manaschi 2 e tanc.
Tant la qualitad architectonica sco er la logica tecnica ed economica èn unidas en in project cun ina gronda qualitad pratica.

Cun l'emprima badigliada dad oz cumenza in temp da construcziun da bundant 2 onns per l'edifizi che vegn a custar circa 10 milliuns francs. La construcziun brutta è planisada per quest onn, e quai per ch'ins possia profitar dals mais d'enviern per concepir ils locals. En la planisaziun sto vegnir resguardada spezialmain l'influenza da l'aura sin 2300 meters sur mar.

Fotografia agiuntada:

Visualisaziun


Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura