La cumissiun dal cussegl grond per furmaziun e cultura ha predeliberà la missiva da la regenza tar l'iniziativa chantunala dal pievel "Mo ina lingua estra en la scola primara (iniziativa da linguas estras)" per mauns dal cussegl grond. Ella è entrada unanimamain sin il project. Cun giuditgar il cuntegn da la pretensiun dal pievel èn las opiniuns dentant stadas differentas en la cumissiun.

La cumissiun dal cussegl grond per furmaziun e cultura ha – sut il presidi da la presidenta da la cumissiun Cornelia Märchy-Caduff – tractà la missiva da la regenza tar l'iniziativa chantunala dal pievel "Mo ina lingua estra en la scola primara (iniziativa da linguas estras)". A la sesida èn er sa participads il cusseglier guvernativ Martin Jäger, sia secretaria dal departament e represchentantas e represchentants da l'uffizi per la scola populara ed il sport. Ultra da quai ha la cumissiun dà l'occasiun ad ina delegaziun dal comité d'iniziativa da declerar al cumenzament da la sesida a bucca ses intents davant la cumissiun.
Suenter ina discussiun intensiva dal cuntegn è la cumissiun entrada unanimamain sin il project ed ha deliberà la "iniziativa da linguas estras" per mauns dal cussegl grond. En quest connex è la maioritad da la cumissiun suandada la proposta da la regenza ed ha recumandà da refusar l'iniziativa. Ils arguments èn stads il model da linguas grischun vertent che tracta ozendi las regiuns linguisticas per gronda part en moda eguala, la mobilitad entaifer il Grischun e la Svizra, ina realisaziun previsiblamain chara e cumplexa da l'iniziativa, la periclitaziun da la pasch linguistica e la smanatscha che la confederaziun pudess intervegnir, sch'il chantun Grischun sa distanziass da la soluziun svizra d'armonisaziun.

Cuntraproposta da la minoritad da la cumissiun
Ina minoritad da la cumissiun è s'engaschada per ina cuntraproposta. Tenor quella duai vegnir instruida mo ina lingua estra en la scola primara. Questa lingua estra duai esser – cuntrari a l'iniziativa che prevesa l'englais u il tudestg tut tenor la regiun linguistica – stringentamain ina lingua chantunala. Tenor la persvasiun da la minoritad da la cumissiun vegniss cun questa soluziun mantegnida la pasch linguistica entaifer il chantun ed il medem mument vegnissan distgargiads las scolaras primaras ed ils scolars primars, quai ch'è l'intenziun da las iniziantas e dals iniziants. La maioritad da la cumissiun ha refusà la cuntraproposta.

Il cussegl grond vegn a tractar l'iniziativa en la sessiun da zercladur 2018.


Infurmaziuns:
presidenta da la cumissiun Cornelia Märchy-Caduff, tel. 079 440 44 57


Gremi: cumissiun per furmaziun e cultura
Funtauna: rg cumissiun per furmaziun e cultura