La regenza ha approvà dus projects da vias a Domat ed a Schlans. Ultra da quai ha ella concedì la permissiun da manar ina scolina Rudolf Steiner a Cuira.
Domat daventa pli segir per pedunas e peduns
Il project per la correctura da la via taliana, entaifer il vitg da Domat, è vegnì approvà cun intginas cundiziuns. La via taliana tranter Cuira e Rehanau è ina part da la rait da las vias principalas da la Svizra. Entaifer il vitg da Domat èsi necessari da meglierar las relaziuns da traffic per las pedunas ed ils peduns e per il traffic da vehichels a motor. Per part è la via stretga e nunsurvesaivla ed en parts dal center dal vitg manca in passape. Medemamain è la via en in nausch stadi architectonic, pervia da la cuvrida betg resistenta a la schelira. Il traject da via che sto vegnir curregì percurra per lung dal center dal vitg sco tal cun il center da cultura e da baselgia Sentupada, cun la baselgia sco er cun pliras fatschentas. Correspundentamain resulta in traffic da pedunas e peduns vaira grond, che percurra fin ussa per part senza protecziun per lung da la via. La correcziun da la via planisada prevesa perquai da crear ina colliaziun senza interrupziun per pedunas e peduns e da stabilisar las stretgas nunsurvesaivlas. La surstructura vegn renovada e la via vegn meglierada, per quant che la structura dal vitg circumdanta permetta quai. Per questas mesiras vegnan calculads custs da var 1,9 milliuns francs.
TBA-Info
La via da Schlans vegn sanada
Il project per la correcziun da la via da Schlans, Pardi – Darplauns, è vegnì approvà cun intginas permissiuns spezialas e cun intginas cundiziuns. Il traject da via che sto vegnir sanà, cumenza a l'ost da la Val Farbertg e finescha tar l'access al vitg da Schlans. La via da Schlans è ina part da la rait chantunala da vias da colliaziun e dat access a la fracziun da Schlans da la vischnanca da Trun. Perquai che sia surstructura n'è betg resistenta a la schelira, è la via donnegiada e demussa defurmaziuns sin ils vials, che derivan da quests donns. Ultra da quai è la via da Schlans per part nunsurvesaivla e per gronda part transibla mo sin in vial. Per quests motivs na satisfa la concepziun da la via betg pli a las pretensiuns actualas envers la rait da colliaziun. Il project cumpiglia il schlargiament da la via, la renovaziun da la surstructura e da l'allontanament da l'aua sco er ina meglieraziun da la geometria. Ils custs da construcziun importan circa 1,8 milliuns francs.
Permissiun per ina scolina Rudolf Steiner a Cuira
La regenza ha concedì a la Rudolf Steiner Pädagogik dal Grischun a Cuira la permissiun da manar ina scola privata (scolina privata). Il concept inoltrà ademplescha tant las prescripziuns da la lescha da scola pertutgant l'instrucziun sco er las disposiziuns chantunalas concernent las mesiras da la pedagogia speziala. Sin fundament dals documents inoltrads survegn la persuna d'instrucziun ultra da quai l'autorisaziun d'instruir.
La permissiun da manar ina scola privata vegn concedida cun la resalva ch'i vegnia communitgà a l'inspecturat da scola fin ils 31 da matg 2018 il lieu da la scolina e fin il pli tard ils 15 da zercladur 2018 ils uraris concrets per l'onn da scola 2018/19.
Cumbinar l'emprendissadi cun il sport da prestaziun
La regenza ha concludì da cuntinuar a partir dal settember 2018 cun il post directiv "furmaziun professiunala e sport da prestaziun" sco purschida permanenta da l'uffizi per la furmaziun professiunala (UCFP). La finamira primara dal post directiv è quella da pussibilitar ad in grond dumber da sportistas e sportists giuvens da terminar in emprendissadi e da cumenzar a medem temp ina carriera en il sport da prestaziun.
Gia dapi la stad 2009 è activ il post directiv dal UCFP sco part integrala dal project "furmaziun professiunala e sport da prestaziun". La durada dal project è vegnida fixada per tschintg onns ed è vegnida prolungada l'onn 2014 per maximalmain quatter ulteriurs onns fin la fin d'avust 2018. Durant questa prolungaziun currenta vegn elavurà in concept che cuntegna mesiras per meglierar la situaziun da las sportistas e dals sportists giuvens che vulan cumbinar in emprendissadi cun la carriera da sport. Las experientschas ch'èn vegnidas fatgas fin ussa cun il project han gia mussà che la purschida è sa cumprovada e ch'ella correspunda al basegn da las sportistas e dals sportists giuvens sco er dals manaschis d'emprendissadi.
La regenza ha permess adattaziuns da las tavlas da lecziuns per scolas cun classas da talent
En vista a l'introducziun dal Plan d'instrucziun 21 GR per l'onn da scola 2018/19 èn tut ils purtaders da scola cun classas da talent obligads d'adattar las tavlas da lecziuns. Las tavlas da lecziuns defineschan quant temp d'instrucziun che stat a disposiziun per sectur spezial ed onn da scola. Las adattaziuns ston vegnir fixadas en furma d'actualisaziuns dals concepts existents e ston vegnir approvadas da la regenza.
Las suandantas scolas cun classas da talent han inoltrà tavlas da lecziuns cun in'adattaziun dal concept: scola communala da San Murezzan, scola communala da Glion, scola da la citad da Cuira e scola populara da Tavau. Suenter avair examinà las tavlas da lecziuns ha l'uffizi per la scola populara ed il sport constatà che tuttas correspundan a las tavlas da lecziuns da la scola populara GR a partir da l'onn da scola 2018/19. Perquai ha la regenza approvà tut las tavlas da lecziuns inoltradas.
Societads d'ovras electricas ston eliminar las consequenzas da l'utilisaziun da la forza idraulica
En il Mesauc gestescha la Elettricità Industriale SA (ELIN) las ovras electricas (OE) Grono e Lostallo. Questas ed ulteriuras ovras electricas chaschunan differenzas dal nivel da l'aua en la Moesa: OE Soazza da las Ovras electricas dal Mesauc SA (Officine Idroelettriche di Mesolcina SA, OIM) sco er OE Sassello da la Calancasca SA. Chaschunadas vegnan questas differenzas tras midadas da la deflussiun da l'aua en il sectur sut la restituziun da l'aua respectiva da las ovras electricas. La regenza ha obligà las societads d'ovras electricas numnadas da prender mesiras per evitar u per eliminar questas pregiudicaziuns. Las mesiras da sanaziun concretas ston vegnir definidas en il rom d'ina ulteriura projectaziun.
©Uffizi federal da topografia
Repartì contribuziuns or da la dieschma d'alcohol e da las taxas da patenta d'alcohol
22 organisaziuns d'utilitad publica, instituziuns, uniuns, federaziuns e fundaziuns survegnan quest onn ina contribuziun dal retgav da las taxas da patenta d'alcohol dal chantun. Totalmain vegnan pajads 519 500 francs. Tenor la lescha d'ustaria vegn il retgav net dal chantun or da la taglia dal commerzi en detagl cun bavrondas destilladas duvrà ad in terz per intents d'utilitad publica ed a dus terzs per la promoziun dal turissem.
Ultra da quai vegnan pajads ora en il chantun Grischun tut en tut 680 639 francs da la dieschma d'alcohol da la confederaziun. Ils meds vegnan duvrads cun preferenza per mesiras d'infurmaziun e d'educaziun che duain gidar a prevegnir cunter problems d'alcohol sco er cunter l'abus da drogas, da narcotics e da medicaments. La segunda prioritad han mesiras per assister uffants e giuvenils da famiglias cun problems da dependenza d'alcohol sco er programs che sa drizzan a gruppas da ristga. Tenor la lescha d'alcohol survegnan ils chantuns 10 pertschient dal retgav net da l'administraziun federala d'alcohol (dieschma d'alcohol).
Collecta da la rogaziun federala 2018
Il retgav da la collecta da la rogaziun federala 2018 vegn surdà – tenor il conclus da la regenza – mintgamai per in terz a las suandantas organisaziuns: fundaziun benevol Grischun (post spezialisà e d'intermediaziun per la lavur voluntara), uniun KJBE (post spezialisà per purschidas cumplementaras e promoturas a la famiglia) e fundaziun chasa per dunnas dal Grischun (protecziun, assistenza e cussegliaziun per dunnas, per lur uffants e per giuvenilas feminilas sur 16 onns en cas da smanatscha e violenza psichica e fisica). Il di da la rogaziun federala è ils 16 da settember 2018. Quel di vegn fatga en tut las baselgias dal chantun ina collecta per intents d'utilitad publica. L'utilisaziun da quella vegn determinada da la regenza.
Gremi: regenza
Funtauna: rg chanzlia chantunala dal Grischun