Ils 10 da zercladur 2018 elegian las votantas ed ils votants dal Grischun en las elecziuns da la regenza e dal cussegl grond lur tschintg cussegliers guvernativs sco er lur 120 represchentantas e represchentants en il cussegl grond per ils proxims 4 onns. In nov video da la chanzlia chantunala respunda sut www.gr.ch las dumondas las pli impurtantas pertutgant las elecziuns chantunalas.

Las votantas ed ils votants dal chantun Grischun han survegnì posta impurtanta – ils documents per las elecziuns da la regenza e dal cussegl grond. Las commembras ed ils commembers da la regenza sco er dal cussegl grond vegnan elegids da nov u reelegids per ina perioda d'uffizi da 4 onns. Las elecziuns en il Grischun èn elecziuns da maiorz. Ils tschintg commembers da la regenza sco er las 120 deputadas e deputads dal cussegl grond vegnan elegids tenor il sistem da maiorz.

Emplenir correctamain ils cedels electorals
La chanzlia chantunala fa attent las votantas ed ils votants ch'i sto vegnir resguardà il suandant per emplenir il cedel electoral:

1. Cedels electorals n'èn betg valaivels, sche:
a) els n'èn betg uffizials;
b) els èn emplenids or auter che a maun;
c) els cuntegnan remartgas ingiuriusas u caracterisaziuns evidentas;
d) els cuntegnan "quel(s) u quella(s) d'enfin ussa" u chaussas sumegliantas.

2. Sco vuschs nunvalaivlas da candidatas e da candidats vegnan stritgads:
a) ils nums da persunas che na pon betg vegnir elegidas u che na pon betg pli vegnir reelegidas;
b) las repetiziuns da nums da candidatas e da candidats ch'il medem cedel electoral cuntegna gia ina giada (cumulaziun);
c) ils nums ch'èn scrits en moda illegibla;
d) ils nums da persunas che n'èn betg designadas cleramain;
e) nums ch'èn da memia (da sut ensi).


Infurmaziuns:
Walter Frizzoni, vicechancelier, chanzlia chantunala dal Grischun, tel. 081 257 22 22, e-mail Walter.Frizzoni@staka.gr.ch


Gremi: chanzlia chantunala
Funtauna: rg chanzlia chantunala