La regenza grischuna ha nominà Giochen Bearth sco nov veterinari chantunal e nov manader da l'uffizi per la segirezza da victualias e per la sanadad d'animals. El surpiglia sia funcziun il 1. da schaner 2019.

Giochen Bearth ha 57 onns ed è creschì si a Sumvitg. Suenter ses studi da medischina veterinara a Friburg ed a Turitg ha el lavurà sco assistent da la facultad da medischina veterinara da l'universitad da Turitg. Suenter sia dissertaziun ha el pratitgà durant passa 20 onns en sia pratica da veterinari a Sumvitg. Ultra da quai ha el er exequì ina funcziun uffiziala sco veterinari districtual per il chantun grischun ed è stà a temp parzial manader da la partiziun "servetschs veterinars" tar la citad da Turitg.

Successur da Rolf Hanimann
Dapi il matg 2010 lavura Giochen Bearth sco substitut dal veterinari chantunal tar l'uffizi per la segirezza da victualias e per la sanadad d'animals dal chantun Grischun. El daventa successur da Rolf Hanimann che va en pensiun il cumenzament da l'onn 2019 suenter in'activitad da bundant 11 onns sco veterinari chantunal e sco manader da l'uffizi.

Controlla da la sanadad d'animals sco er da l'entira chadaina da victualias
L'uffizi per la segirezza da victualias e per la sanadad d'animals (USVA) surveglia l'entira chadaina da victualias – davent da la producziun da las substanzas primaras fin al product che vegn vendì. En il rom da l'execuziun dal dretg veterinar e da la legislaziun da victualias ha el l'incumbensa da proteger las consumentas ed ils consuments da ristgas per la sanadad e d'engions en connex cun victualias. Plinavant exequescha l'uffizi las prescripziuns davart la protecziun dals animals. La finala ademplescha el ulteriuras incumbensas executivas che han in connex cun la segirezza da victualias e cun la sanadad d'animals e che servan a la protecziun da las consumentas e dals consuments, uschia en il sectur da la legislaziun davart las substanzas chemicas, en il sectur da la legislaziun davart la protecziun cunter radiaziuns concernent il radon sco er en il sectur dal commerzi en detagl cun bavrondas destilladas. Actualmain occupa el var 70 collavuraturas e collavuraturs. L'onn 2016 ha il USVA ultra da quai surpiglià incumbensas executivas per il chantun Glaruna en quests secturs.

Fotografia agiuntada:

Infurmaziuns:
cusseglier guvernativ Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg departament d'economia publica e fatgs socials