La regenza grischuna ha elegì Ines Pöschel sco nova cussegliera da banca per la banca chantunala grischuna. Ella cumenza ses uffizi il 1. d'avust 2018.

Tenor la lescha davart la banca chantunala grischuna (BCG) è la regenza cumpetenta per eleger il cussegl da banca che sa cumpona da set persunas. Ils 31 da mars 2018 ha il vicepresident da la banca Fabrizio Keller demissiunà dal cussegl da banca, perquai ch'el aveva cuntanschì la limita dal temp d'uffizi tenor la lescha. La regenza ha fatg l'elecziun substitutiva. Ella ha elegì Ines Pöschel sco commembra dal cussegl da banca per la perioda d'uffizi fin ils 31 da mars 2022. Ella è l'emprima dunna en il cussegl da banca per la banca chantunala grischuna.

Ines Pöschel ha 50 onns ed è burgaisa da Winterthur. La giurista ch'è maridada e che viva a Turitg ha acquistà l'onn 1993 il licenziat da giurisprudenza a l'universitad da Turitg e l'onn 1996 la patenta d'advocata. Dapi l'onn 1996 lavura Ines Pöschel sco advocata, dapi l'onn 2007 sco partenaria e dapi l'onn 2010 sco commembra da la direcziun d'in impurtant biro d'advocatura dal dretg d'economia en Svizra. Ines Pöschel è vegnida elegida pervia da sia experientscha cumprovada da blers onns en il dretg d'economia general sco er en il sectur da las bancas e dals servetschs finanziars. Ses champs da lavur centrals èn il dretg dal martgà da chapital ed il dretg da societads cun focus sin dumondas da governance e da transacziuns d'interpresas. Ultra da quai è ella docenta en pliras scolas autas. Plinavant po ella profitar da sias experientschas en divers organs directivs strategics sco cussegliera d'administraziun d'interpresas quotadas e betg quotadas resp. sco cussegliera da fundaziun en cumissiuns spezialisadas.

La regenza surveglia la banca chantunala grischuna tenor in concept da surveglianza ch'ella ha relaschà e che includa las pretensiuns legalas e regulatoricas. La renovaziun dal cussegl da banca ch'è adina puspè necessaria ademplescha las prescripziuns da l'autoritad federala per la surveglianza dals martgads da finanzas (FINMA) ed il profil d'exigenzas da la regenza per il cussegl da banca.

Fotografia agiuntada:

Ines Pöschel


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch  


Gremi: regenza
Funtauna: rg chanzlia chantunala dal Grischun