Ils dumbers d'annunzias als examens d'admissiun chantunals per las scolas medias èn cumparegliabels cun quels da l'onn precedent, malgrà la diminuziun da las naschientschas. En tut han 766 scolaras e scolars fatg ils examens d'admissiun 2018. L'onn precedent eran quai 764 candidatas e candidats. Dals 766 giuvenils han 296 scolaras e 222 scolars dumagnà l'admissiun ad ina da las totalmain nov scolas medias grischunas.

Sco gia l'onn passà han gì lieu ils mais da favrer e da mars ils examens d'admissiun chantunals per entrar en ina scola media grischuna. 348 scolaras primaras e scolars primars da la 6. classa (2017: 360) e 418 giuvenils da la 2. u 3. classa da la scola secundara u en singuls cas er dal 10. onn da scola u nà d'in emprendissadi (2017: 404) han absolvì ils examens d'admissiun chantunals ch'èn vegnids realisads en ils nov lieus d'examen.

La quota d'admissiun per il gimnasi da lunga durada è stabila
Dals 348 uffants da la scola primara che han fatg l'examen vegnan 210 a pudair entrar il proxim onn da scola en la 1. classa dal gimnasi da 6 onns (gimnasi da lunga durada) (2017: 227). La quota da success importa pia 60,34 pertschient (2017: 63,06 pertschient). Perquai che la 1. classa gimnasiala na po – tenor las disposiziuns d'admissiun vertentas – betg vegnir repetida, ston las scolaras ed ils scolars ch'entran en il gimnasi da lunga durada vegnir promovids a la fin dal 1. onn gimnasial en la 2. classa gimnasiala; cas cuntrari ston ellas ed els turnar en la scola secundara.
Areguard il total da scolaras e scolars da la 6. classa primara (1613) importa la quota da giuvenils admess a la 1. classa dal gimnasi da lunga durada 13,02 pertschient. Cumpareglià cun l'onn precedent è la quota d'admissiun pia stabila (2017: 13,05 pertschient da 1740 scolaras e scolars da la 6. classa primara).

Buna quota da success per l'entrada en la scola media commerziala u en la scola media spezialisada
Quest onn han 418 giuvenils fatg l'examen d'admissiun chantunal per la 3. classa dal gimnasi sco er per la 1. classa da la scola media commerziala u da la scola media spezialisada (examen unitar) (2017: 404). 182 han ademplì las premissas per entrar en la 3. classa dal gimnasi (2017: 183). La quota da success importa 43,54 pertschient (2017: 45,30 pertschient). 126 candidatas e candidats han dumagnà las cundiziuns d'admissiun per entrar en la 1. classa da la scola media commerziala u da la scola media spezialisada (2017: 98). Quai è ina quota da success da 30,14 pertschient (2017: 24,26 pertschient).
La quota d'admissiun per entrar en la 3. classa gimnasiala (ch'è la 1. classa dal gimnasi da 4 onns, pia dal gimnasi da curta durada) importa 10,52 pertschient en proporziun cun l'annada relevanta (2017: 10,46 pertschient).


Infurmaziuns:
Regina Just Brodbeck, uffizi per la furmaziun media-superiura, manadra da la partiziun "scolas medias", tel. 081 257 61 69, e-mail Regina.Just@ahb.gr.ch


Gremi: uffizi per la furmaziun media-superiura
Funtauna: rg uffizi per la furmaziun media-superiura