Fin 12 IPM engiadinaisas pon render ils proxims onns lur interpresas – cun in sustegn professiunal – pli favuraivlas per famiglias e meglierar uschia lur attractivitad sco patrunas. Il program dal post da stab per l'egualitad da las schanzas e dal center UND vegn cuntinuà.

Sco en l'entira Svizra èn sa midads fundamentalmain er en il Grischun ils models da famiglia durant ils ultims 20 onns. La gronda part da las chasadas d'in pèr cun uffants surpiglia oz cuminaivlamain ils custs da ses bains necessaris per viver. Il model da famiglia tradiziunal cun la dunna sco mamma e chasarina e cun l'um sco nutrider vegn vivì er en il Grischun mo pli da circa in quart dals pèrs che han uffants en la vegliadetgna prescolara. Quest svilup vegn a cuntinuar.
Persunas che tschertgan ina plazza da lavur sa decidan per bunas cundiziuns da lavur, e las interpresas profitan da forzas da lavur engaschadas che s'identifitgeschan cun la firma. Betg sco ultim gidan interpresas favuraivlas per famiglias er a dar ina perspectiva a las famiglias giuvnas en nossas vals.

Rinforzar la cumpetitivitad
Las IPM participadas analiseschan – sut instrucziun –, sche lur cundiziuns da lavur èn favuraivlas per famiglias, ellas sviluppan ed emprovan mesiras individualas. A maisas radundas pon ellas barattar lur ideas davart il success e davart las sfidas e profitar vicendaivlamain. Ils resultats vegnan analisads ed evaluads ensemen cun las interpresas. La finamira dal program e quella da stgaffir la conscienza per ils aspects economics positivs da cundiziuns da lavur favuraivlas per famiglias.

Capacitads per novas IPM
Las IPM participadas vegnan a sa scuntrar ed a barattar lur ideas per l'emprima giada en il rom d'ina occurrenza iniziala che ha lieu ils 7 da zercladur 2018. Independentamain da quai pon s'annunziar novas IPM engiadinaisas interessadas fin la fin da zercladur 2018 tar il post da stab per l'egualitad da las schanzas (www.stagl.gr.ch) per in'admissiun al project. Otg IPM engiadinaisas èn gia da la partida. Il project "IPM Engiadina" dura fin l'onn 2020.

Program ch'è sa cumprovà
Fin ussa èn sa participadas als projects precursurs per ina meglra cumpatibilitad da la professiun cun la famiglia tut en tut 18 interpresas cun 1300 collavuraturas e collavuraturs en la Val dal Rain grischuna ed en las regiuns Viamala, Surselva ed Alvra. Il post da stab per l'egualitad da las schanzas realisescha quests projects dapi l'onn 2011 en collavuraziun cun il center UND, il center da cumpetenza per dumondas da la cumpatibilitad da la professiun cun la famiglia/la vita privata. Sustegnì vegn il project dal chantun, da las regiuns e da la confederaziun.


Questas IPM èn da la partida:
Spitex Engiadin'ota, Samedan
Clinica Gut, San Murezzan
Fundaziun TGU tgira d'uffants Engiadin'ota, Samedan
Scuol Samignun Val Müstair turissem, Scuol
Hotel Waldhaus, Segl Maria
Academia Engiadina, Samedan
Lyceum alpinum Zuoz
Ovras electricas d'Engiadina SA, Zernez


Infurmaziuns:
Susanna Mazzetta, manadra da project, post da stab per l'egualitad da las schanzas, tel. 081 257 35 72, mob. 079 483 74 01, e-mail Susanna.Mazzetta@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas