La regenza ha approvà in project collectiv voluminus per renovar vias da guaud e vias da maschinas. Ultra da quai ha ella dà glisch verda ad in project per la correcziun da la via dal Lucmagn ed ad ina scolaziun da maturitad bilingua tudestg/englais a l'Institut autalpin Ftan.
Project collectiv per renovar vias da guaud
La regenza ha approvà in project collectiv da differentas vischnancas per renovar vias da guaud e vias da maschinas. Ultra da quai ha ella garantì a las vischnancas ina contribuziun chantunala da maximalmain 9,73 milliuns francs. Dapi 10 onns elavura l'uffizi da guaud e privels da la natira (UGP) mintga onn in tal project per pudair satisfar al basegn fitg grond da renovar vias da guaud.
Ils projects 2008 fin 2016 han pudì vegnir realisads e terminads cun success. Er il project 2017 è per gronda part realisà e po probablamain vegnir terminà quest onn cumplettamain. Il basegn da renovar vias da guaud è però anc adina cumprovà en tut il chantun e na dastga er betg vegnir tralaschà en il futur. Pia vegnan er ils onns 2018 e 2019 renovadas tar vias da guaud e tar vias da maschinas las installaziuns per allontanar l'aua u construcziuns da sustegn sco er schlargiadas en tscherts puncts stortas, plattas da volver ed ulteriuras passaschas memia stretgas. Ultra da quai vegnan reparadas differentas vias da guaud ch'èn vegnidas donnegiadas da malauras. Tut en tut vegnan renovadas vias da guaud e vias da maschinas d'ina lunghezza da 55,6 kilometers. Uschia vegn meglierada l'avertura da circa 11 290 hectaras guaud. La realisaziun dal project collectiv 2018 dura puspè 2 onns.
Trimmis, primavaira 2018
La via dal Lucmagn sto vegnir schlargiada
La regenza ha approvà il project per la correcziun dal traject da la via dal Lucmagn a Fontanivas cun intginas permissiuns spezialas e cun cundiziuns. L'axa da traffic principala tranter la Surselva ed il cunfin cun il Tessin è memia stretga en quest traject, quai che chaschuna problems per la segirezza dal traffic cunzunt l'enviern ed en cas da bler traffic. Plinavant è la via en in stadi insuffizient, pervia da la cuvrida betg resistenta a la schelira.
Cun la correcziun da la via planisada èsi previs da schlargiar la via, da renovar la surstructura ed il sistem per allontanar l'aua sco er d'adattar l'access da la plazza da campadi a la via chantunala a las pretensiuns da la tecnica da segirezza. Ils custs totals dal project importan var 8,75 milliuns francs e vegnan pajads dal chantun (via dal Lucmagn) e da la vischnanca (access al campadi).
Diploms da maturitad bilingua tudestg/englais al gimnasi Ftan
L'Institut autalpin Ftan (IAF) ha survegnì la permissiun da manar exclusivamain ina scolaziun da maturitad bilingua tudestg/englais a partir da l'onn da scola 2019/2020. Il IAF ha l'intenziun da porscher la scolaziun tenor las directivas da la cumissiun svizra da maturitad (CSM) cun ina instrucziun d'immersiun en englais da l'emprima fin la sisavla classa gimnasiala. La regenza ha approvà las adattaziuns correspundentas da la tavla da lecziuns sco er dal plan d'instrucziun ed ha mess en vigur quels per il cumenzament da l'onn da scola 2019/2020.
Il medem mument cun l'introducziun dal gimnasi biling tudestg/englais duai l'obligatori vertent per l'instrucziun en rumantsch per scolaras e scolars che vegnan da la scola populara rumantscha, vegnir abolì a partir da la terza classa gimnasiala. Per promover la lingua rumantscha po rumantsch vegnir tschernì sco segunda lingua naziunala u sco rom facultativ. Ils emprims diploms da maturitad bilingua tudestg/englais duain vegnir emess la fin da l'onn da scola 2022/23.
Gremi: regenza
Funtauna: rg chanzlia chantunala dal Grischun