Il guaud grischun è tut en tut en in bun stadi. Questa conclusiun – formulada en moda curta – cuntegna il rapport davart la persistenza che l'uffizi da guaud e privels da la natira ha elavurà. En il rapport èn dentant er fixads aspects, als quals sto vegnir dada in'attenziun speziala.

Il guaud è ina part da noss spazi da viver ed in element caracteristic dal maletg actual da la cuntrada. Circa 30 pertschient da la surfatscha dal chantun Grischun è cuverta cun guaud. La surfatscha da guaud crescha ad in crescher, ils ultims 30 onns per en media 1400 hectaras per onn. Quai correspunda circa a 2000 plazzas da ballape. Per che nus possian profitar er en l'avegnir dals avantatgs dal guaud, sto quel vegnir protegì, tgirà ed utilisà en moda persistenta. Questa incumbensa n'è betg facila, perquai ch'i ston vegnir resguardads differents basegns e coordinadas las pretensiuns multifaras.

Sis finamiras per la protecziun dal guaud
Il rapport davart la persistenza da l'uffizi da guaud e privels da la natira mussa detagliadamain il stadi actual dal guaud grischun. Per valitar il stadi dal guaud e la cultivaziun persistenta dal guaud èn vegnids considerads ils sis uschenumnads criteris da Helsinki "resursa guaud", "guaud da protecziun", "producziun da laina", "diversitad biologica", "sanadad e vitalitad" sco er "rentabilitad ed utilisaziun per la recreaziun". Ils criteris da Helsinki èn finamiras surordinadas per la protecziun dals guauds europeics ch'èn vegnidas deliberadas l'onn 1993 da la conferenza da ministers da l'Europa. Applitgond quests criteris vegnan la surfatscha da guaud, la reserva da laina, l'effect da protecziun e la diversitad biologica dal guaud en il Grischun giuditgads sco buns. In basegn d'agir exista en spezial en connex cun la regiuvinaziun dal guaud, cun ils donns da ruier e cun l'utilisaziun da la laina. Accentuada vegn en il rapport davart la persistenza er la gronda impurtanza dal guaud sco spazi da recreaziun per la populaziun indigena e per ils turists.

Il guaud ha blers talents
Mo tgi ch'enconuscha il guaud e tgi ch'è conscient da quest sistem ecologic cumplex e varià, vesa la vaira valur da mintga singul bostg. Per quest motiv vul l'uffizi da guaud e privels da la natira infurmar la populaziun grischuna ils proxims onns en moda simpla e multifara davart ils differents talents dal guaud. Quai sco cuntinuaziun dal plan per il svilup dal guaud (PSG) e dal rapport davart la persistenza. Regularmain vegnan publitgadas infurmaziuns captivantas davart il guaud e davart sias abitantas e ses abitants sin la pagina d'internet www.multitalentwald.ch. Ultra da quai vegn lantschada cun il hashtag "#MultitalentWald" ina concurrenza, nua che la populaziun po publitgar atgnas fotografias dal guaud sur las medias socialas Facebook, Twitter ed Instagram. Uschia pon tuts mussar lur talent persunal dal guaud.

Il rapport davart la persistenza sco er ulteriuras infurmaziuns davart il multitalent guaud e davart la concurrenza da fotografias pon vegnir consultads sin www.multitalentwald.ch.


Infurmaziuns:
- Reto Hefti, selvicultur chantunal, uffizi da guaud e privels da la natira, tel. 081 257 38 51, e-mail Reto.Hefti@awn.gr.ch
- dr. Riet Gordon, manader dal sectur planisaziun dal guaud e reviers forestals, tel. 081 257 38 55, e-mail Riet.Gordon@awn.gr.ch  


Gremi: uffizi da guaud e privels da la natira
Funtauna: rg uffizi da guaud e privels da la natira