La regenza ha concludì da desister en il futur d'ina glista naira da persunas che pajan lur premias cun retard. Ultra da quai ha ella incumbensà la scola auta da pedagogia dal Grischun cun l'installaziun sco er cun la gestiun d'ina professura speziala.

Obligaziun da pajar la premia: la glista naira na vegn betg cuntinuada
La regenza ha concludì la revisiun parziala da l'ordinaziun tar la lescha davart l'assicuranza da malsauns e la reducziun da las premias. Uschia na vegn betg cuntinuada la glista naira da persunas che pajan lur premias cun retard.
Igl è vegnì constatà – sco en auters chantuns er – che questa glista, che vegn manada dapi il 1. da schaner 2014, na cuntanscha betg l'effect giavischà. La maioritad da las assicuranzas da malsauns n'annunzia betg a l'institut d'assicuranza sociala (IAS) che las scussiuns vegnan cuntinuadas, cun l'effect che las persunas che pajan lur premias cun retard na vegnan betg inscrittas sin la glista naira. Il squitsch giavischà da pajar ad ura la premia na vegn uschia betg cuntanschì per gronda part, perquai che las persunas, che pajan lur premias cun retard, na pon correspundentamain er betg vegnir sancziunadas. Il cumportament betg unitar da las cassas da malsauns chaschuna percunter in tractament inegual da las persunas che pajan lur premias cun retard.
Per ch'il IAS possia terminar en moda ordinada la gestiun da la glista da las persunas che pajan lur premias cun retard, dovra ella in tschert temp. Pervia da quai vegn la glista abolida a partir dal 1. d'avust 2018.

Professura speziala per la scola auta da pedagogia dal Grischun
La regenza ha incumbensà la scola auta da pedagogia dal Grischun (SAPGR) d'installar e da manar dal 1. da fanadur 2018 fin ils 30 da zercladur 2024 ina professura speziala per la didactica da plurilinguitad integrada (DPI). Per la durada dal project da 6 onns vegn messa a disposiziun ina contribuziun chantunala maximala da 3,6 milliuns francs. Resalvada resta l'approvaziun dal preventiv annual tras il cussegl grond.
Cun la professura speziala vul la SAPGR d'ina vart far experiments e retschertgas cun models da scola cun ina instrucziun linguistica immersiva. Da la plivalur che resulta da quai duain profitar la perscrutaziun ed il svilup, la scienza e la furmaziun supplementara sco er las activitads en il sectur dals servetschs. Autras incumbensas impurtantas da la professura speziala èn da l'autra vart la promoziun da la generaziun giuvna da scienziadas e scienziads, la procuraziun da meds finanzials da terzas varts, la lavur da publicitad ed il management da qualitad.
A partir da la mesadad da l'onn chalendar 2014 duain la professura speziala e sias incumbensas respectivas vegnir integradas en il manaschi regular da la SAPGR.

Promover vinavant la vendita da muvel
Il sistem da pajaments directs da la politica agrara federala 2018 – 2021 surlascha la tegnida d'animals anc adina pli fitg a las reglas dal martgà liber, perquai ch'ils pajaments directs, che sa refereschan a l'animal, èn per gronda part crudads davent. La tegnida d'animals è tras quai vegnida messa pli e pli sut squitsch. Sin dumonda da graubündenVIEH SA vegn la promoziun da la vendita da muvel e da la commerzialisaziun da muvel da niz e da maz en il Grischun fixada mintga onn da la regenza. I vegnan fixadas differentas mesiras voluminusas e garantidas contribuziuns per activitads da reclama sco er mesiras che distgargian il martgà ed autras facilitaziuns per las puras ed ils purs.
Per organisar e per realisar ils martgads publics da muvel da maz survegn graubündenVIEH SA per arments ina contribuziun da 40 francs per animal e per nursas e chauras ina contribuziun da mintgamai 5 francs per animal. Per manar ina structura da marketing professiunala e per activitads da reclama vegn pajada ad ella pauschalmain ina contribuziun da 106 000 francs. Ultra da quai vegnan messas a disposiziun contribuziuns d'export da maximalmain 111 000 francs per promover la vendita da nursas e da chauras sco er maximalmain 62 000 francs per il servetsch da transport e da preschentaziun.

Program da promoziun per manaders da sport futurs
La regenza ha approvà il program "1418Manader", cun il qual duai vegnir promovì sistematicamain la generaziun giuvna da manadras e manaders. En il rom dal concept chantunal per promover il sport è vegnida definida la finamira che giuvenils da 14 fin 18 onns duain surpigliar ina cunresponsabladad en lur uniun da sport en il chantun Grischun. Uschia duai vegnir facilitada la tschertga da manadras e manaders en uffizi d'onur ed impedì ch'ils giuvenils sortian baud da l'uniun.
Il program "1418Manader" dat als giuvenils l'instrumentari necessari per pratitgar la funcziun dal manader auxiliar. Il medem mument duain vegnir promovids l'engaschament da talas manadras auxiliaras e tals manaders auxiliars e la garanzia a lunga vista da la generaziun giuvna da manadras e manaders. 15 uniuns e federaziuns han gia signalisà ina collavuraziun a l'uffizi per la scola populara ed il sport, tranter quels l'associaziun grischuna da ballape, la federaziun da skis dal Grischun, GRhockey e l'associaziun grischuna da gimnastica.

www.graubuendensport.ch/1418Leiter

©Sportamt Kanton Zürich

La regenza sustegna la cuntinuaziun dal project gimnastica ma-pi
La regenza grischuna sustegna la cuntinuaziun dal project gimnastica ma-pi da la federaziun grischuna da gimnastica cun ina contribuziun or dal fond da sport. Per ina durada da 3 onns conceda ella maximalmain 195 000 francs. Per quai duai la gimnastica per mammas e pitschens (er la gimnastica per babs e pitschens, furma curta: ba-pi) vegnir purschida en tut il chantun en fitg buna qualitad. Il project gimnastica ma-pi è sa sviluppà fitg bain dapi ch'el è vegnì inizià la stad 2009. La purschida da 65 curs dal cumenzament ha pudì vegnir extendida ad actualmain 87 curs. Uschia ha er pudì vegnir augmentà per passa 20 pertschient il dumber d'uffants che fan gimnastica en ina purschida cun ina manadra scolada per quai.

Approvà in project collectiv per ovras da protecziun
La regenza ha approvà il project collectiv "Reparaziun d'ovras da protecziun 2018" da differentas vischnancas, da la Viafier retica e da l'uffizi da construcziun bassa dal Grischun. Il project ha la finamira da conservar ovras da protecziun existentas cunter privels da la natira mantegnend il standard oriund sco er da meglierar l'effect da quests stabiliments. Pertutgads dal project collectiv èn 46 objects. Ils custs totals importan 7,8 milliuns francs.

Glista dals projects per ovras da protecziun 2018

Megliers rempars per il Sertigbach a Tavau
La regenza ha approvà cun cundiziuns e cun permissiuns in project da la vischnanca da Tavau per construir rempars per il Sertigbach. La funtauna dal Sertigbach sa chatta tranter la chadaina dal Ducan ed il Chüealphorn. El sbucca a Frauenkirch en la Landwasser. Daratgas durant ils mais da stad dals onns 2015 e 2016 han scuvrì ristgas da segirezza en il sectur "Hinter den Eggen" dal curs sura da l'aual da muntogna. Il traject periclità da l'aual sa chatta en ina part planiva sur l'hotel Walserhuus. En questa part da l'aual han las auas grondas laschà enavos sedimentaziuns da material en differents lieus. Per che la protecziun dals stabiliments d'infrastructura vischins sco hotel, via, plazzas da parcar, fermadas da l'auto da posta e sendas da viandar possia vegnir garantida, vegn construì in collectur da glera avert. Als custs da 590 000 francs per il project sa participeschan la confederaziun (206 500 francs) ed il chantun (118 000 francs) tenor la cunvegna da program "Ovras da protecziun cunter l'aua".

Contribuziuns finanzialas per in project da correcziun da las auas a Scuol
La regenza ha approvà il project per la correcziun dal curs d'aua da la Clozza a Scuol cun intginas cundiziuns, permissiuns e midadas da project. La confederaziun ed il chantun sa participeschan a la finanziaziun cun contribuziuns per la correcziun dals curs d'aua. La contribuziun federala importa circa 195 000 francs e la contribuziun chantunala 111 400 francs.
La Clozza è in aual da muntogna e curra amez tras il center dal vitg da Scuol. Il fanadur 2015 han urizis chaschunà in'aua gronda en la Clozza. La punt sisum en il territori dal vitg è sa mussada sco stretga. Ina rampa a blocs, differentas traversas, conducts d'ovra traversants sco er ierts da chasas cunfinantas èn vegnids donnegiads u destruids. La finala ha la Clozza bandunà ses letg tar la punt giusum ed ha inundà dus edifizis d'abitar e grondas parts da surfatschas agriculas. Il project da correcziun cumpiglia objects da la construcziun idraulica en otg lieus per lung da tut il curs da l'aual en il territori dal vitg. L'element central è la construcziun d'in nov indriz per dosar il material che vegn transportà da l'aua. Cun quest indriz da dosar duai il transport da material en direcziun dal vitg vegnir franà u mitigià en cas d'aua gronda.

Ils provediments d'aua da Zignau e da Sumvitg vegnan renovads
La regenza ha garantì contribuziuns chantunalas per renovar ils stabiliments dal provediment d'aua. D'ina vart vegn garantida a la Corporaziun d'aua Trun ina contribuziun chantunala da circa 456 000 francs per il provediment d'aua da Zignau. Da l'autra vart vegn deliberada ina contribuziun chantunala da circa 507 000 francs per la vischnanca da Sumvitg per ses provediment d'aua (emprima e segunda etappa). Tuttas duas contribuziuns premettan in subvenziunament correspundent da la confederaziun. Ils stabiliments respectivs dals provediments d'aua èn actualmain en in nausch stadi e ston vegnir sanads.

Entrada en vigur da la lescha davart las taglias communalas e davart las taglias da baselgia
Il cussegl grond ha approvà en la sessiun da favrer 2018 la revisiun parziala da la lescha davart las taglias communalas e davart las taglias da baselgia (LTCTB). Cun la revisiun parziala da la lescha survegnan las vischnancas la pussaivladad da stgaffir la basa legala en lur leschas da turissem per incassar ina taxa d'alloschament. Quella remplazzass la taxa da giasts/taxa da cura actuala. Vischnancas che vulessan far questa midada, ston stgaffir las disposiziuns correspundentas en la lescha communala da turissem. Quest process legislativ communal dovra temp, schebain che l'administraziun da taglia ha gia elavurà in model da lescha correspundent. Per che las vischnancas possian cumenzar uschè svelt sco pussaivel cun las lavurs correspundentas, metta la regenza en vigur la revisiun parziala da la LTCTB per il 1. da fanadur 2018.

Projects da votaziun dals 23 da settember 2018
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 23 da settember 2018:

- conclus federal dals 13 da mars 2018 davart las vias da velo sco er las vias e sendas da viandar (cuntraproposta directa tar l'iniziativa dal pievel «Per la promoziun da las vias da velo e da las vias e sendas da viandar [iniziativa per il velo]»;
- iniziativa dal pievel dals 26 da november 2015 "Per victualias saunas sco er producidas en moda ecologica e faira (iniziativa da fair-food)"; e
- iniziativa dal pievel dals 30 da mars 2016 «Per la suveranitad alimentara. L'agricultura pertutga nus tuts".

Dumengia, ils 23 da settember 2018, vegni ultra da quai votà davart il suandant project chantunal:
- iniziativa chantunala dal pievel "Mo ina lingua estra en la scola primara" (iniziativa da linguas estras).


Gremi: regenza
Funtauna: rg chanzlia chantunala