La regenza grischuna ha deliberà per mauns dal cussegl grond la missiva tar la revisiun parziala da la lescha da polizia dal chantun Grischun, tar la desditga dal concordat davart las prestaziuns da segirezza privatas sco er tar la realisaziun da la revisiun da la lescha federala davart las multas disciplinaras.

Midadas en la lescha da polizia
Cun la revisiun parziala da la lescha da polizia duain vegnir realisadas las mesiras formuladas en il rapport "Polizia dal Grischun 2015plus". Tranter auter duai vegnir precisada la cunfinaziun tranter las incumbensas polizialas dal chantun e da las vischnancas. Tras quai vegn midada la situaziun giuridica vertenta. Las vischnancas na duain betg survegnir incumbensas polizialas supplementaras. Ellas duain però vegnir autorisadas da fermar persunas per procurar per quietezza, urden e segirezza. Las ulteriuras mesiras polizialas ch'èn regladas en la lescha da polizia e las mesiras repressivas che stattan a disposiziun per realisar talas restan vinavant resalvadas a la polizia chantunala.
Ultra da quai duai vegnir stgaffida ina basa legala che regla tgi che surpiglia ils custs da las incumbensas da las polizias communalas che vegnan ademplidas da la polizia chantunala. Er la surveglianza da persunas en il spazi public ed en il spazi ch'è accessibel al public duai vegnir reglada da nov. Quai na duai betg pli esser resalvà a la polizia chantunala. Da qua davent duain tut ils posts che adempleschan incumbensas publicas dastgar survegliar en moda visibla il spazi public ed il spazi ch'è accessibel al public, sch'il basegn da protecziun è cumprovà.
Plinavant duai vegnir stgaffida la basa legala per pudair equipar la polizia chantunala cun apparats da registraziun e da transmissiun audiovisuals mobils. En il center stattan actualmain meds da surveglianza mobils sco per exempel dronas sco er apparats per registrar maletgs e tuns che vegnan purtads vi dal corp, uschenumnadas bodycams. Tals e sumegliants meds mobils duai la polizia chantunala pudair duvrar durant in'acziun per l'ina per procurar infurmaziuns e per l'autra per survegliar lieus generalmain accessibels.
La finala duain er enconuschientschas fatgas en il passà vegnir integradas en la revisiun. En spezial cun l'introducziun dal cudesch da procedura penala svizzer sco er dapi il relasch da la lescha da polizia han pudì vegnir rimnadas experientschas preziusas. Tranter auter duain vegnir precisadas la protecziun da datas, las mesiras secretas preventivas da la polizia, l'obligaziun d'annunzia en cas d'expulsiuns per consequenza da violenza a chasa sco er vegnir sclerida la procedura chantunala da multas disciplinaras.

La regenza vul bandunar il concordat davart las prestaziuns da segirezza privatas
Ils 15 da favrer 2015 è il chantun Grischun daventà commember dal concordat davart las prestaziuns da segirezza privatas. A chaschun da la participaziun al concordat davart las prestaziuns da segirezza privatas è il chantun Grischun partì dal fatg ch'il concordat vegnia a stgaffir in'unificaziun dal dretg sin plaun naziunal en il sectur da l'admissiun d'interpresas da segirezza privatas e d'emploiads da segirezza privats. Questas finamiras na pon betg pli vegnir cuntanschidas cun il concordat davart las prestaziuns da segirezza privatas, cunquai ch'ils chantuns Berna e Turitg, nua che 50 pertschient da las interpresas da segirezza privatas e dals emploiads da segirezza privats èn domiciliads, èn sa decidids da betg participar. Ultra da quai na po – sin fundament d'ina expertisa da la cumissiun da concurrenza (CUMCO) dals 5 da december 2016 – betg vegnir realisà il concept, tenor il qual ils custs da las proceduras da permissiun dal concordat davart las prestaziuns da segirezza privatas avessan duì vegnir cuvrids tras taxas. En vista a questa chargia finanziala supplementara ed en vista al pegiurament da la posiziun sin il martgà da las interpresas da segirezza e dals emploiads da segirezza dal Grischun envers purschiders da prestaziuns da segirezza privatas da chantuns che n'èn betg commembers dal concordat davart las prestaziuns da segirezza privatas propona la regenza da bandunar il concordat.

Realisaziun da la lescha federala davart las multas disciplinaras
La confederaziun ha extendì la procedura da multas disciplinaras sin ulteriuras leschas federalas per pudair sancziunar en il futur facilmain e svelt er cuntravenziuns cunter questas leschas. Per il chantun Grischun signifitga questa revisiun, ch'el sto designar las autoritads ed ils organs cumpetents per persequitar e per giuditgar ils surpassaments ch'èn suttamess da nov a la lescha federala davart las multas disciplinaras. Quai fa el cun adattar tschintg leschas.

Il cussegl grond vegn a tractar las missivas en la sessiun d'avust 2018.


Agiunta:
Missivas


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: rg chanzlia chantunala