En differentas destinaziuns turisticas dal Grischun han lieu questa stad var 50 curs da basa gratuits per giasts che han in velo da muntogna electric. Questas scolaziuns curtas vegnan purschidas dal chantun a tut ils giasts da stad en il rom dal project grischunE-MTB. Realisadas vegnan ellas da guids da velo da muntogna grischuns certifitgads en collavuraziun cun las destinaziuns..

Exercità vegni adina la sonda da las 10.00 fin las 11.30 en las differentas regiuns. A questa purschida sa participeschan Cuira, Tavau, Claustra, Lai, Flem, Tusaun, Savognin, San Murezzan e Puschlav. Quests trenaments èn gratuits e cumpiglian ina introducziun davart il velo da muntogna electric e davart il cumportament gist sin las circa 100 rutas signalisadas en il Grischun, unitads d'exercizi per ir segir cun velo da muntogna, rinfrestgament da las enconuschientschas da basa e pitschnas sfidas per ciclistas e ciclists da velo da muntogna da tut ils stgalims da savida e da vegliadetgna. L'emprim curs ha gia gì lieu a Cuira ils 2 da zercladur. Las participantas ed ils participants èn stads intgantads.

Promover l'ir cun velo da muntogna electric en il chantun
L'avrigl 2018 han ils guids da velo da muntogna frequentà ina furmaziun supplementara specifica en il rom d'ina scolaziun da swiss cycling guide ch'è vegnida promovida da grischunE-MTB. Ils swiss cycling guides grischuns dattan paisa en questas lecziuns da velo da muntogna electric al pli impurtant en chaussas avair en maun il velo, segirezza, tecnicas d'ir cun velo ed en spezial d'ir cun velo da muntogna electric, ma er concernent scuntradas cun auters utilisaders da las sendas e vias da viandar.
En il rom dal project grischunE-MTB, il project successur electrifitgà da grischunBIKE, vegnan definidas 13 mesiras per promover l'ir cun velo da muntogna electric en moda generala e duraivla en il chantun. Quellas vegnan realisadas ussa pass per pass. Ina mesira ha la finamira da mussar als giasts cun ina curta scolaziun, co ch'ins va enturn en moda segira cun in velo da muntogna electric. Cun questas mesiras ha il Grischun ina rolla directiva en Svizra en il sectur da l'ir cun velo da muntogna electric. Il chantun sa basa sin sias experientschas existentas en il sectur dal velo da muntogna e prepara sasez sco er ils giasts per il tema autamain actual dal velo da muntogna electric.

grischunBIKE-GUIDES
La cuminanza d'interess dals swiss cycling guides grischuns s'engascha per ses guids e per lur activitads en il Grischun. La finamira è quella da promover questa professiun, d'engrondir la rait da contacts, d'infurmar e da realisar projects a favur dal sport da velo da muntogna e dal turissem. La cuminanza d'interess è ina fusiun dals guids da velo da muntogna che abitan en il Grischun e che han la scolaziun certifitgada da swiss cycling.



Infurmaziuns:
Peter Stirnimann, direcziun dal project grischunE-MTB, uffizi da construcziun bassa dal Grischun, tel. 079 257 72 75, e-mail Peter.Stirnimann@tba.gr.ch  


Gremi: uffizi da construcziun bassa
Funtauna: rg uffizi da construcziun bassa