La regenza serra temporarmain in vast spazi d'aria sur Segl per dronas. Ultra da quai ha ella dà glisch verda a la dischlocaziun d'in manaschi da chavals a Silvaplauna.

Serrada dal spazi d'aria per dronas durant la scuntrada da sis a Segl
Per in vast territori sur Segl e sur la plazza aviatica a Samedan ha la regenza relaschà ina serrada dal spazi d'aria per dronas, per multicopters, per helicopters da model e per aviuns da model. La serrada dal spazi d'aria vala da mesemna, ils 5 da settember 2018, a las 6.00, fin gievgia, ils 6 da settember 2018, a las 18.00.
Il motiv per questa serrada è la scuntrada da las sis scheffas e schefs dals stadis germanofons. Durant questa occurrenza sto vegnir fatg quint cun dapli traffic aviatic. Ultra da quai vegn questa occurrenza a chaschunar in grond interess medial. Pervia da quai pudessan represchentants da las medias sco er persunas privatas duvrar pli savens dronas per far registraziuns da maletgs. Pervia da quests objects sgulants pudess exister il privel ch'ils participants da questa occurrenza sco er il traffic aviatic local pudessan vegnir periclitads considerablamain. Per garantir la segirezza da l'occurrenza resta quest spazi aviatic serrà per objects sgulants fin ad in pais total da 30 kilograms.

_{©Uffizi federal da topografia}
Zonas serradas per dronas: zonas da protecziun da la plazza aviatica (pinc), asils da selvaschina (oransch) e serrada temporara dal spazi d'aria (mellen)

Midada da zona per dischlocar in manaschi da chavals a Silvaplauna
La regenza ha approvà la revisiun parziala da la planisaziun locala concludida da la vischnanca da Silvaplauna ils 7 da december 2017. Cun quai dat ella glisch verda a la dischlocaziun planisada dal manaschi da chavals da la Hossmann Stallungen SA che sa chatta oz amez la zona d'abitar 1 da Champfèr. Pervia da las relaziuns stretgas n'è il lieu actual dal manaschi da chavals betg optimal. Quai tant per il gestiunari dal manaschi da chavals sco er per las vischinas ed ils vischins.
Gia ils 9 da mars 2016 aveva la radunanza communala da Silvaplauna concludì ina revisiun parziala da la planisaziun locala "manaschi da chavals Champfèr" ch'è però vegnida approvada mo parzialmain da la regenza ils 24 d'october 2017. Decisiva per la refusa parziala dal project da planisaziun locala è stada en spezial in'expertisa da la cumissiun federala per la protecziun da la natira e da la patria (CFNP). A chaschun da l'elavuraziun dal plan general da furmaziun per il manaschi da chavals Champfèr èn per quest motiv vegnids redimensiunads ils edifizis sco er la surfatscha planisada per ils implants al liber.
Il medem mument cun approvar la planisaziun surlavurada refusa la regenza in recurs da planisaziun da proprietaris cunfinants.

_{©Comet Photoshopping ScRL/ Dieter Enz}
Areal per construcziuns autas (circumdà d'in ur mellen), zona per sport da chavals (verd)

La reducziun da la taglia da traffic per vehichels che chaschunan paucas emissiuns resta sco ch'ella è
La regenza ha concludì da betg reducir las limitas vertentas per CO₂, che furman la basa per la reducziun da la taglia da traffic, e da las laschar sco ch'ellas èn fin ils 31 da december 2020. Dapi l'onn 2011 èn las limitas per la svapur da CO₂ vegnidas reducidas mintga 2 onns per tegnair quint dals progress cuntanschids tar las emissiuns dals vehichels a motor ligers (autos da persunas).
Las emissiuns da CO₂ da tut ils vehichels novs vendids ils onns 2016 e 2017 èn però sa reducidas mo pli per 1,1 g/km u 0,81 pertschient (da 135,2 g/km a 134,1 g/km). Dapi l'introducziun da la reducziun da la taglia da traffic per vehichels che chaschunan paucas emissiuns è questa valur adina vegnida adattada al progress tecnologic cuntanschì. Ils ultims 2 onns n'è in tal pia quasi betg capità. Vitiers vegn che la Svizra ha introducì dapi l'atun passà pass per pass ina nova procedura tendenzialmain pli severa per examinar il consum da carburant e las emissiuns. Pervia da quai pari raschunaivel a la regenza da mantegnair per ulteriurs 2 onns las limitas da CO₂ vertentas ch'èn decisivas per il rabat.

Nov urden da scola per la scola chantunala grischuna a Cuira
La regenza ha suttamess l'urden da scola per la scola chantunala grischuna a Cuira che deriva da l'onn 1973 ad ina revisiun totala. Las disposiziuns da l'ordinaziun èn vegnidas simplifitgadas ed adattadas al temp dad oz. Pervia da las midadas da la societad dals ultims decennis, da las refurmas da la scolaziun en las scolas medias sco er da la digitalisaziun èsi daventà necessari d'adattar e da structurar da nov l'urden da scola per la scola chantunala grischuna. Ultra d'ina simplificaziun generala e d'ina actualisaziun da las disposiziuns da l'ordinaziun cuntegna la revisiun totala da l'urden da scola per la scola chantunala grischuna disposiziuns generalas per il manaschi da scola, per las uniuns da scola, per las organisaziuns da scolaras e scolars sco er per las furmaziuns da chor e da musica. Regladas e structuradas da nov èn er vegnidas las pussaivladads da sancziuns disciplinaras e la via giudiziala. Questa revisiun parziala entra en vigur ils 15 d'avust 2018.


Gremi: regenza
Funtauna: rg chanzlia chantunala dal Grischun