La regenza ha concedì ina contribuziun chantunala per la cursa internaziunala da mountainbike "Swiss Epic". Ultra da quai ha ella dà glisch verda per extender la cussegliaziun per mammas e per babs en il Grischun ed ha approvà in project per proteger cunter lavinas a Samignun.

Contribuziun chantunala per in'occurrenza da mountainbike unica sin quest mund
La regenza ha concedì als partenaris grischuns da Swiss Epic ina contribuziun chantunala annuala da maximalmain 300 000 francs per organisar la cursa da mountainbike "Swiss Epic" 2019 fin 2023. "Swiss Epic" tutga ensemen cun "Cape Epic" en l'Africa dal sid e cun mintgamai ina cursa en ils Stadis Unids e en la Nova Zelanda tar la "Epic Series" che ha in'attracziun internaziunala. "Swiss Epic" duai vegnir sviluppà al meglier event da mountainbike da las Alps e vegnir commerzialisà en il rom da las "Epic Series". Ils partenaris grischuns da Swiss Epic èn sa fatgs valair cunter autras destinaziuns svizras ed estras en las Alps. Questa occurrenza da bike unica sin il mund gida a rinforzar anc pli fitg il posiziunament dal Grischun tar ils velos da muntogna.
"Swiss Epic" vegn ad avair lieu ils onns 2019 fin 2023 mintgamai durant 1 emna da l'avust u dal settember. Spetgads vegnan mintgamai circa 600 fin 1000 participantas e participants (profis ed amaturs) sco er circa 600 persunas accumpagnantas, uschia ch'i po vegnir fatg quint cun var 10 000 pernottaziuns. Per onn d'occurrenza vegnan resguardadas mintgamai trais destinaziuns sco lieu d'etappa: Arosa, Flem Laax, Lai e Scuol mintgamai duas giadas, San Murezzan trais giadas e Tavau quatter giadas

©Destinaziun Tavau Claustra

La cussegliaziun per mammas e per babs vegn extendida
La regenza ha approvà ina cunvegna da prestaziun cun l'uniun KJBE per extender la purschida da la cussegliaziun per mammas e per babs en il chantun Grischun. L'incumbensa che l'uniun KJBE aveva fin ussa cumpiglia l'organisaziun d'ina cussegliaziun per mammas e per babs da poppins e d'uffants fin al 3. onn da vita cumplenì. Cun la nova cunvegna da prestaziun vegn la cussegliaziun per mammas e per babs extendida sin uffants fin al 5. onn da vita cumplenì.
L'evaluaziun da las purschidas da cussegliaziun ch'existan gia ha mussà ch'i dat en il chantun Grischun ina largia en la purschida da prevenziun per geniturs d'uffants da 4 e da 5 onns. Per geniturs d'uffants da quella vegliadetgna na datti pia nagina cussegliaziun en ils secturs tgira, nutriment, svilup ed educaziun. Questa largia duai ussa vegnir serrada cun in'extensiun da la purschida da cussegliaziun per mammas e per babs en tut il Grischun. Il chantun Grischun indemnisescha a l'uniun KJBE ils custs che resultan en il rom da l'incumbensa fin ad in import maximal da 550 000 francs per onn.

La protecziun cunter lavinas a Samignun sto vegnir dauzada
La regenza ha approvà il project "Extensiun dals indrizs cun pitgas da siglientar lavinas Val da Chierns / Val Motnaida" da la vischnanca da Samignun ed ha deliberà per quest intent ina contribuziun chantunala da maximalmain 774 300 francs.
A Samignun vegnan protegids territoris d'abitadi e vias da traffic da passa 30 indrizs cun pitgas da siglientar controlladamain lavinas. Dus da quels indrizs stattan en la Val da Chierns e trais en la Val Motnaida. Ils ultims onns èsi sa mussà che questas duas regiuns grondas, nua che sa distatgan adina puspè lavinas, na pon betg vegnir controlladas suffizientamain cun ils indrizs avant maun. Cun tschintg pitgas supplementaras da siglientar lavinas vegnan ils abitadis sco er la via chantunala puspè protegids suffizientamain cunter eveniments da la natira.

©Uffizi federal da topografia


Gremi: regenza
Funtauna: rg chanzlia chantunala dal Grischun