Sin invit dal chantun Grischun ha il cusseglier federal Ueli Maurer visità oz l'Engiadina. Ensemen cun il cusseglier guvernativ Christian Rathgeb è el stà preschent ad ina controlla da persunas, da rauba e da vehichels ch'è vegnida realisada da la polizia chantunala e da l'administraziun federala da duana (AFD).

A chaschun d'ina controlla che la polizia chantunala dal Grischun e la AFD (corp da guardias da cunfin e duana) han realisà cuminaivlamain en il territori Lagalb / Diavolezza èn il cusseglier federal Ueli Maurer, il cusseglier guvernativ Christian Rathgeb ed il directur da la AFD Christian Bock sa laschads mussar ils apparats ils pli moderns e las metodas da controlla en l'acziun effectiva. En teams maschadads èn vegnidas fatgas controllas detagliadas da persunas, da rauba e da vehichels. Spezialists han sustegnì la controlla cun in apparat da radiografar, cun in chaun detectur da drogas e cun in spectrometer da mobilitad ionica per constatar materias explosivas.

Il cusseglier federal Ueli Maurer ha profità da l'inspecziun da la controlla per suttastritgar la gronda impurtanza da la AFD cun il corp da guardias da cunfin e cun la duana. A maun da l'exempel pratic en l'Engiadina ha el ludà la collavuraziun excellenta cun il chantun Grischun ed ha confermà che la segirezza als cunfins dal Grischun vegnia garantida er vinavant cun ils medems meds. Plinavant ha el explitgà ch'ils process vegnian digitalisads cun il program da transfurmaziun da la AFD «DaziT» uschia, ch'ils passagis dal cunfin possian vegnir controllads en moda pli simpla e pli svelta. Ils meds che daventan libers qua tras vegnan investids a vista pli lunga en la segirezza.

Il cusseglier guvernativ Christian Rathgeb è stà cuntent da la garanzia da la confederaziun. El ha explitgà ch'ils chantuns procurian per la segirezza interna en collavuraziun cun la confederaziun, uschia ch'i saja da gronda impurtanza ch'i vegnian impundids avunda meds finanzials per la segirezza als cunfins dal Grischun. El ha accentuà che la collavuraziun funcziunia excellentamain. La regenza ed il departament cumpetent vegnan a s'engaschar er vinavant activamain per in ferm corp da guardias da cunfin. Plinavant han ins pudì sa referir al discurs constructiv dals 25 da zercladur 2018 e render attent anc ina giada a las relaziuns al cunfin ost e sid.

Fotografia agiuntada:

Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
- Alex Josty, manader communicaziun AFD, tel. 079 459 67 44, e-mail Alex.Josty@ezv.admin.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad