La regenza ha fixà las contribuziuns da gulivaziun per l'onn 2019 da las 106 vischnancas grischunas sco er la gulivaziun da las grevezzas socialas da l'onn 2017. Totalmain vegnan pajadas contribuziuns da 58,5 milliuns francs.

Il potenzial da resursas decisiv per l'onn da gulivaziun 2019 è creschì – sur tut las vischnancas – per 11,3 milliuns francs sin 769,7 milliuns francs (+1,5 pertschient). Entant che las taglias da las persunas natiralas e da las persunas giuridicas èn s'augmentadas durant ils onns da taxaziun, èn sa reducids ils tschains d'aua e las taglias sin immobiglias. Il potenzial da resursas mesaun per persuna chantunala decisiva importa 3720 francs (onn precedent: 3683 francs). La marscha en connex cun il potenzial da resursas sa reducescha envers l'onn precedent e tanscha da la vischnanca da Furna ch'è actualmain la pli debla cun 33 puncts (2018: er 33 puncts) fin a la vischnanca da Farera ch'è la pli ferma cun 538 puncts (2018: 607 puncts).

Per la gulivaziun da las resursas 2019 vegnan mantegnids ils parameters da l'onn precedent: I vegnan applitgadas vinavant la tariffa da prelevaziun da 16,0 pertschient ed ina dotaziun minimala da 68,0 pertschient da la media chantunala. Tras quai survegnan 66 vischnancas totalmain 26,7 milliuns francs or da la gulivaziun da las resursas. Quai correspunda ad in augment envers l'onn precedent da 0,3 milliuns francs u dad 1,0 pertschient. Las contribuziuns vegnan messas a disposiziun dal chantun (circa 8,3 milliuns francs) e da las 39 vischnancas finanzialmain fermas (circa 18,5 milliuns francs).

Da la gulivaziun da las grevezzas geografic-topograficas e da scola survegnan 49 vischnancas autorisadas sco l'onn precedent totalmain 24 milliuns francs. Quests meds finanzials vegnan mess a disposiziun dal tuttafatg dal chantun. La contribuziun la pli gronda survegn cun 2,0 milliuns francs la vischnanca da Tavau.

Il chantun conceda ina gulivaziun a quellas vischnancas ch'èn suttamessas ad ina grevezza sproporziunada en il sectur da l'agid social material. Questa contribuziun vegn calculada a maun dals custs nets da las vischnancas en proporziun cun lur potenzial da resursas. Sin dumonda da las vischnancas vegnan las contribuziuns da gulivaziun fixadas mintgamai l'onn suandant. Per l'onn 2017 han – suenter l'examinaziun da basa – 29 vischnancas il dretg da survegnir contribuziuns da totalmain 5,8 milliuns francs or da la gulivaziun da las grevezzas socialas. La part principala pertutga cun 3,7 milliuns francs la citad da Cuira.

5 vischnancas cun paucas resursas survegnan l'onn 2019 dal chantun supplementarmain ina gulivaziun limitada da tut en tut stgars 0,5 milliuns francs (onn precedent: 1,2 milliuns). Questa gulivaziun facilitescha a questas vischnancas da midar al nov sistem da gulivaziun da finanzas ch'è en vigur dapi l'onn 2016. La gulivaziun vegn reducida pass per pass e pajada l'ultima giada l'onn 2020.

En il rom da la gulivaziun individuala d'inegualitads per grevezzas spezialas (GIG) po la regenza conceder ina contribuziun speziala ad ina vischnanca, sche la vischnanca cumprova ch'ella vegn suttamessa a grevezzas sproporziunadas pervia da relaziuns u d'eveniments extraordinaris. Per l'onn 2019 è previs in import dad 1,5 milliuns francs per la GIG.

Ils parameters da la gulivaziun da las resursas da l'onn 2019 sco er il volumen total da l'onn 2019 per la gulivaziun da las grevezzas geografic-topograficas e da scola e per la gulivaziun individuala d'inegualitads per grevezzas spezialas vegn il cussegl grond a fixar definitivamain cun il preventiv 2019.


Agiuntas:
- tabella da la gulivaziun da finanzas 2019 (GRes e GGG) per vischnanca
- tabella da la gulivaziun da las grevezzas socialas 2017 per vischnanca
- grafica da la gulivaziun da las resursas per persuna: cumparegliaziun 2019/2018
- grafica da la repartiziun da las vischnancas tenor l'index dal potenzial da resursas 2019 e 2018
- grafica da la repartiziun da la GGG tenor regiuns


Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch
- Thomas Kollegger, manader da l'uffizi da vischnancas, tel. 081 257 23 81, e-mail Thomas.Kollegger@afg.gr.ch


Gremi: regenza
Funtauna: rg chanzlia chantunala