A temp per il cumenzament da l'onn da scola èn cumparids en la retscha da meds d'instrucziun "mediomatix" meds d'instrucziun da lingua en ils idioms puter, sursilvan, sutsilvan e vallader, ch'èn accordads cun il nov plan d'instrucziun. Per entant stattan a disposiziun ils meds d'instrucziun per la 2. classa dal stgalim primar e per la 3. classa dal stgalim secundar I. Ils meds d'instrucziun per las ulteriuras classas cumparan ils proxims onns.

Ils novs meds d'instrucziun da lingua analogs e digitals per la scola populara obligatorica en ils idioms puter, sursilvan, sutsilvan e vallader vegnan elavurads da la scola auta da pedagogia dal Grischun per incumbensa dal chantun Grischun. L'onn passà èn cumparids en la retscha da meds d'instrucziun "mediomatix" sco emprima publicaziun grammaticas unitaras per quests quatter idioms.

Ovra d'instrucziun cun quatter cudeschs da lavur
Per l'onn da scola 2018/19 èn ussa disponiblas er las ovras d'instrucziun cumplettas per la 2. classa dal stgalim primar sco er per la 3. classa dal stgalim secundar I. Per idiom e per classa cumpiglia l'ovra d'instrucziun quatter cudeschs da lavur per las scolaras ed ils scolars sco er in commentari per la persuna d'instrucziun che ha er quatter parts. Il commentari per la persuna d'instrucziun stat a disposiziun mo sco cudesch digital. Ils cudeschs da lavur datti tant en ina furma stampada sco er en ina furma digitala per l'utilisaziun en scola.

Accordà cun ils idioms e cun il Plan d'instrucziun 21
Ils cuntegns dals meds d'instrucziun èn accordads cun il Plan d'instrucziun 21 Grischun e pussibiliteschan ina instrucziun moderna en ils idioms. Ultra d'in concept cuminaivel suror tut ils idioms, metta il med d'instrucziun tar il cuntegn er gronda paisa sin particularitads idiomaticas. Uschia èn ils cudeschs da lavur dals quatter idioms bain concepids en moda unitara ed han in cuntegn ch'è fitg sumegliant – ma betg identic.

Il diever dals meds d'instrucziun è vegnì declerà da la regenza sco "obligatoric" per l'onn da scola 2018/19. Las parts da l'ovra d'instrucziun pon vegnir empustadas tar ils Meds d'instrucziun dal Grischun (www.lmv.gr.ch).

Las proximas publicaziuns en il rom dal project da meds d'instrucziun "mediomatix" èn previsas per l'onn da scola 2019/20. Fin quest termin vegnan a cumparair ils meds d'instrucziun per la 3. classa dal stgalim primar e per la 2. classa dal stgalim secundar I.

Fotografia agiuntada:

Infurmaziuns:
- Rico Cathomas, manader dal project mediomatix, scola auta da pedagogia dal Grischun, tel. 078 625 75 75, e-mail Rico.Cathomas@phgr.ch
- Josy Marie Künzler, manadra dal sectur meds d'instrucziun, uffizi per la scola populara ed il sport, tel. 081 257 22 61, e-mail Josy.Kuenzler@avs.gr.ch


Gremi: uffizi per la scola populara ed il sport
Funtauna: rg uffizi per la scola populara ed il sport