Las taglias communalas e chantunalas sin l'ierta e sin donaziuns duain vegnir unifitgadas, tras quai ch'il chantun mida da la taglia sin il relasch a la taglia sin la part d'ierta. Ultra dals conjugals e dals uffants vegnan liberads da l'obligaziun da pajar taglia er ils geniturs ed ils pèrs en concubinat. En il chantun vegnan engrevgiads main ferm ils confamigliars dal tschep dals geniturs e pli ferm ils ulteriurs pajataglias.

En il dretg vertent incassescha il chantun ina taglia sin il relasch e sin donaziuns, entant che las vischnancas pon incassar ina taglia sin la part d'ierta e sin donaziuns. La regenza ha deliberà la missiva tar la revisiun parziala da la lescha chantunala da taglia e da la lescha davart las taglias communalas e davart las taglias da baselgia, cun la quala pon vegnir unifitgads ils geners da taglia, las regulaziuns legalas e l'execuziun da las taglias sin l'ierta e sin donaziuns.

Sin plaun chantunal è la midada essenziala dal project quella, che geniturs vegnan liberads da la taglia e ch'ils confamigliars dal tschep dals geniturs (fragliuns, nevs e nezzas e.u.v.) vegnan suttamess ad ina taglia pli bassa. Per ils ulteriurs retschaviders vegn augmentada la tariffa da taglia. En il chantun resulta tras quai in minus d'entradas en la dimensiun da circa 4,2 milliuns francs.

Consequenzas per las vischnancas
Las vischnancas pon vinavant decider, sch'ellas vulan incassar ina taglia sin l'ierta e sin donaziuns, e fixar las tariffas da taglia en il rom dals imports maximals dal dretg chantunal. Quests imports cumpiglian per il tschep dals geniturs senza midadas 5 pertschient e per ils ulteriurs retschaviders da nov 20 pertschient (oz 25 pertschient). La liberaziun da taglia per conjugals, uffants, partenaris da concubinat e geniturs vala er en las vischnancas. Las vischnancas obtegnan pitschnas entradas supplementaras, perquai ch'i croda davent la deducziun da la taglia chantunala sin il relasch. Ina decleraziun generala davart las consequenzas da la revisiun en las vischnancas n'è dentant betg pussaivla, pervia da las differentas situaziuns da partenza.

Sch'il chantun e las vischnancas incasseschan las medemas taglias, ston vegnir unifitgads la basa legala e l'imposiziun da taglia. La regulaziun ha lieu en la lescha chantunala da taglia e l'imposiziun vegn fatga da l'administraziun chantunala da taglia.

La revisiun parziala duai vegnir tractada dal cussegl grond en la sessiun da favrer 2019 ed entrar en vigur per il 1. da schaner 2020.


Agiunta:
missiva


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas dal Grischun, tel. 081 257 32 01, e-mail Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun