La cumissiun dal cussegl grond per politica da stadi e strategia (CPSS) ha predeliberà il rapport da la regenza davart la realisaziun d'in center da scola auta (CSA) per la scola auta da tecnica ed economia (SATE) Cuira. Il project che ha chattà il sustegn da la cumissiun, vegn tractà dal cussegl grond en la sessiun d'october 2018.

En sia debatta vegn la CPSS a la conclusiun ch'igl è da gronda impurtanza ed urgenza per il chantun Grischun da realisar in center da scola auta a Cuira. La SATE Cuira vegn a sortir da la scola auta spezialisada da la Svizra orientala e vegn a vegnir accreditada ed organisada en moda independenta. Perquai sto ella – er tenor l'avis da la cumissiun – vegnir posiziunada da nov, e sia purschida da scolaziun sto vegnir adattada.

Promover l'immigraziun da persunas spezialisadas
La cumissiun ha sustegnì l'enconuschientscha da la regenza ch'i dovria – en quest ambient economic pretensius – ina scola auta che promova l'immigraziun da talents e da persunas spezialisadas, ch'è buna d'ademplir las pretensiuns da l'economia e da la perscrutaziun locala envers la scolaziun, che ha success sco lieu cumpetent per la scolaziun e per la furmaziun supplementara e che furnescha ina contribuziun al transfer da savida e da tecnologia. Ils ultims onns è il dumber da studentas e students s'augmentà cuntinuadamain, uschia ch'i han adina puspè stuì vegnir prendidas en locaziun localitads supplementaras, cun la consequenza che la scola auta è repartida oz sin plirs lieus a Cuira. Abstrahà dal fatg ch'ina ulteriura extensiun da la purschida da scolaziun e da la surfatscha da las localitads n'è betg pli pussaivla, van a perder sinergias pervia da duplicitads.

Amplificaziun dal lieu actual
Tenor l'avis da la cumissiun duain vegnir eliminadas questas mancanzas tras la tscherna d'in unic lieu en in center da scola auta a Cuira en il senn d'in campus. Per la cumissiun mussa la regenza en moda persvadenta en sia analisa dals lieus – sin basa da facturs sco la disponibladad da surfatschas da terren, las pussaivladads d'avertura e d'engrondiment, l'integraziun d'aspects da la planisaziun dal territori, l'adressament, la visibilitad, ils custs sco er la durada da la realisaziun – ch'il lieu il pli cunvegnent è il lieu actual da la SATE Cuira a la Pulvermühlestrasse. Il program da spazi duai porscher plazza a 1700 fin 2000 studentas e students, actualmain hai var 1500 studentas e students.

Betg tractar a medem temp il center d'innovaziun
Calculà optimisticamain duessi esser pussaivel da realisar il nov center da scola auta fin l'onn 2025. Las investiziuns bruttas duain importar var 125 milliuns francs. Da quella summa duain circa 30 milliuns francs vegnir surpigliads da la confederaziun. La cumissiun ha medemamain acceptà la furmaziun da reservas per il basegn da meds finanzials dal chantun en l'autezza da 90 milliuns francs sin donn e cust dal quint 2018. La finala ha la cumissiun er prendì enconuschientscha dal fatg ch'i dovria ina votaziun dal pievel en il rom d'ina atgna missiva da construcziun per realisar in center da scola auta. Percunter ha la cumissiun refusà unanimamain da pussibilitar a la regenza en il rom dal rapport da la SATE Cuira da prevair – ensemen cun la missiva per la construcziun d'in center da scola auta – er ina missiva per la construcziun da 400 meters quadrat surfatscha d'auzada per in center d'innovaziun, perquai che quel na stettia betg en in connex direct cun la realisaziun d'in center da scola auta.

La fatschenta è vegnida tractada sut la direcziun dal president da la cumissiun, deputà Bruno W. Claus. Sa participà è er il cusseglier guvernativ Martin Jäger. La CPSS propona al cussegl grond da prender enconuschientscha dal rapport e d'acceptar las propostas da la regenza, cun in'excepziun (cifra 8 da las propostas).


Infurmaziuns:
Bruno W. Claus, president da la cumissiun per politica da stadi e strategia, tel. 079 300 33 70


Gremi: cumissiun per politica da stadi e strategia
Funtauna: rg cumissiun per politica da stadi e strategia