La cumissiun dal cussegl grond per furmaziun e cultura ha predeliberà la missiva da la regenza tar la revisiun totala da la lescha davart las scolas medias en il chantun Grischun. Ella sustegna per gronda part il sboz da lescha.

Suenter ina discussiun davart il cuntegn da la missiva è la cumissiun pudì sa persvader ch'ina revisiun totala da la lescha actuala davart las scolas medias saja inditgada. Per quest motiv è ella entrada unanimamain sin il project. La tractativa detagliada ha alura mussà che la maioritad da la cumissiun sustegna il sboz da lescha preschentà. I èn vegnidas proponidas mo paucas midadas da gener formal.

Tematisà da nov la scola media d'informatica
En il rom da la revisiun parziala da la lescha davart las scolas medias l'onn 2014 aveva la regenza previs la scola media d'informatica en il sboz da lescha. Il cussegl grond aveva però refusà quella en la sessiun d'october 2014 cun ina decisiun fitg stretga. Sin quai ha la regenza renunzià da proponer puspè al cussegl grond d'introducir la scola media d'informatica. Ina minoritad da la cumissiun vul ussa però far ina segunda emprova ed incumbensescha il cussegl grond d'integrar la scola media d'informatica en la lescha sco partiziun pussaivla d'ina scola media.

Dal rest fa ina minoritad da la cumissiun anc propostas concernent il mantegniment da la confessiun da cretta, concernent il dretg da conceder ina incarica da prestaziun per manar ina scola media e concernent il dretg da pajar ina pauschala da talent.

Questa fatschenta è vegnida tractada sut la direcziun dal president da la cumissiun Christian Kasper. A la sesida han ultra da quai prendì part il cusseglier guvernativ Martin Jäger ed il manader da l'uffizi per la furmaziun media-superiura Hans Peter Märchy. Il cussegl grond vegn a tractar questa fatschenta en la sessiun d'october 2018.


Infurmaziuns:
Christian Kasper, president da la cumissiun per furmaziun e cultura, tel. 079 611 15 41


Gremi: cumissiun per furmaziun e cultura
Funtauna: rg cumissiun per furmaziun e cultura