La regenza è s'exprimida davart in project da consultaziun da la confederaziun concernent la prevenziun da vegliadetgna. Ultra da quai ha ella approvà in project da via per distgargiar il center dal vitg da Müstair.
La regenza beneventa il project da la AVS
La regenza ha prendì posiziun tar in project da consultaziun da l'uffizi federal d'assicuranzas socialas per stabilisar la AVS (AVS 21). Il project vul segirar la finanziaziun da la AVS e garantir il nivel da las rentas. Previsa è l'assimilaziun da la vegliadetgna da referenza per dunnas ed umens a 65 onns. Actualmain correspunda ella a 64 onns per las dunnas ed a 65 onns per ils umens. Ultra da quai èn planisadas mesiras cumpensatoricas per quest augment da la vegliadetgna da referenza. Ulteriuras finamiras dal project èn la flexibilisaziun da la retratga da la renta sco er ina finanziaziun supplementara a favur da la AVS.
La regenza beneventa explicitamain las finamiras dal project. Suenter che la refurma da la prevenziun da vegliadetgna 2020 ha fatg naufragi è il chantun Grischun da l'avis che la proposta cun dus projects separads saja adattada per s'occupar da las sfidas demograficas ed economicas en la 1. e la 2. pitga e per rumper la bloccada da refurmas en la prevenziun da vegliadetgna. Quai vul dir, ch'i sto vegnir realisada svelt ina revisiun separada er en il sectur da la prevenziun professiunala obligatorica per equilibrar la finanziaziun da la 2. pitga.
La prevenziun da vegliadetgna sto garantir che tut las persunas ch'èn ablas da lavurar disponan en moda duraivla d'ina prevenziun suffizienta. Sche quai na vegn betg garantì, resultan problems socials e finanzials considerabels per las persunas pertutgadas e per ils chantuns. La prevenziun che sa basa sin in sistem da trais pitgas è sa cumprovada fitg bain en il passà sco model economic e social svizzer. Sche la 1. e la 2. pitga na cuntanschan però betg pli la finamira constituziunala da garantir l'existenza, ston vegnir duvrads dapli meds finanzials chantunals per ina finamira che duess atgnamain vegnir cuntanschida cun il sistem da trais pitgas. Quai cun prestaziuns supplementaras a la AVS/AI (PS) finanziadas sur la taglia. Pia ston las grondas ovras socialas da la 1. e la 2. pitga vegnir adattadas a las normas socialas ed economicas dal 21. tschientaner.
Consultaziuns dal departament federal da l'intern
Distgargia per il center dal vitg da Müstair
La regenza ha approvà in project per la correcziun da la via dal pass dal Fuorn cun permissiuns spezialas e cun cundiziuns. La via dal pass dal Fuorn è l'unica colliaziun, e correspundentamain relevanta, da la Val Müstair cun l'Engiadina bassa e cun il Tirol dal sid dador il cunfin svizzer e maina tranter auter tras il center stretg dal vitg da Müstair. A l'ost da questa via da transit chantunala tras il vitg passa la via da meglieraziun via Prövis che la vischnanca da Val Müstair ha construì. Quella vegn duvrada tant dal traffic local sco er dal traffic pesant sco ruta per guntgir la traversada da Müstair stretga e nunsurvesaivla.
La via Prövis duai vegnir signalisada da nov sco via principala e la via chantunala actuala en il center dal vitg da Müstair duai vegnir cedida a la vischnanca. Cun dus projects da via duain la via Prövis ed il traject da colliaziun da la via dal pass dal Fuorn vegnir engrondids. Quest project cuntegna tranter auter ina nova traversada cun ina insla d'amez sin autezza da la sbuccada da la senda da scoula. Ultra da quai duai il sectur da la sbuccada da la via Prövis en la via chantunala sco er l'entrada e la sortida da la plazza da parcar existenta vegnir concepids da nov. Plinavant duain vegnir allontanads la fermada per l'auto da posta ed il stabiliment da tualettas che sa chattan là ed i duai vegnir construì da tuttas duas varts da la via in trottuar per lung da la via chantunala actuala. Cun ina insla d'amez, ch'è construida cun salaschada e sur la quala i po vegnir charrà, che sa chatta en il sectur da la sbuccada duai vegnir svià da nov il traffic davent dal center dal vitg e duain vegnir pussibilitadas il medem mument l'entrada e la sortida dal traffic local.
Gist attatg al project chantunal duai vegnir realisà in project da la vischnanca da Val Müstair. Cun quest project vul la vischnanca construir ina nova fermada per l'auto da posta directamain davant la claustra ed en in auter lieu in nov stabiliment da tualettas sco er arranschar da nov las plazzas da parcar.
Aua per terren setgentà a Maiavilla
La regenza ha garantì a la vischnanca burgaisa da Maiavilla ina contribuziun chantunala da maximalmain 856 200 francs per la construcziun da l'indriz da sauar Rieter e sorts dals burgais, quai cun resalva d'ina cofinanziaziun da la confederaziun. Ils custs totals dal project importan circa 2,8 milliuns francs.
La sauaziun da la surfatscha da 200 hectaras è necessaria, perquai ch'igl è da far quint cun ina mancanza d'aua en media mintga terz onn. Ultra da las relaziuns climaticas centralalpinas cun paucas precipitaziuns resulta la mancanza d'aua dal favugn che buffa savens en questa regiun e che setgenta il terren. L'aua per la sauaziun duai vegnir retratga dal pumpadi d'aua sutterrana da la citad da Maiavilla. Il project duai vegnir realisà ils onns 2018 e 2019 en duas etappas.
©Uffizi federal da topografia
Gremi: regenza
Funtauna: rg chanzlia chantunala dal Grischun