A partir da la sessiun d'october 2018 pon ins persequitar las sesidas dal cussegl grond live en l'internet. La conferenza da las presidentas e dals presidents dal cussegl grond ha realisà il conclus dal cussegl grond concernent l'introducziun d'in livestream or da las sessiuns dal cussegl grond.

En la sessiun da favrer 2018 aveva il cussegl grond concludì che las sessiuns duajan vegnir transmessas live en l'internet. La conferenza da las presidentas e dals presidents ha procurà silsuenter ch'i vegnia installada l'infrastructura tecnica necessaria. Questa infrastructura ha pudì vegnir examinada e controllada entaifer l'administraziun durant las sessiuns da zercladur e d'avust 2018, e detagls tecnics han pudì vegnir adattads. Durant la proxima sessiun d'october vegnan ussa transmessas las debattas dal cussegl grond per l'emprima giada live vers anora. Il stream funcziuna sin la pagina d'internet dal cussegl grond sut https://www.gr.ch/RM/instituziuns/parlament/session/live.

Il cussegl grond en tut las 150 vals
Il livestream or da las sesidas dal cussegl grond a Cuira permetta ussa da persequitar las debattas en tut las 150 vals – premessa è natiralmain ina colliaziun d'internet. Il stream stat a disposiziun a tut ils geners usitads d'apparats finals. El po vegnir guardà tant sin il smartphone sco er sin il tablet u sin il computer. Uschia s'avischina il cussegl grond a la populaziun e cunzunt er a las regiuns dal Grischun pli distantas da Cuira.


Infurmaziuns:
Domenic Gross, manader dal secretariat dal cussegl grond, tel. 081 257 22 32, e-mail Domenic.Gross@staka.gr.ch


Gremi: secretariat dal cussegl grond
Funtauna: rg secretariat dal cussegl grond